Të gjitha automjetet e braktisura nga pronarët e tyre apo ato të cilat janë të bllokuara do të largohen nga rrugët e Tiranës.
Lajmin e mirë e dha kryetari i Bashkisë, Erion Veliaj i cili tha se do të pastrohen rrugicat e Tiranës nga këto mjete të braktisura që qëndrojnë prej muajsh apo vitesh pa lëvizur fare.
“Makinat e aksidentuara, për efekt hetimi, duhet të ruhen disa muaj. Disa mund të kenë edhe vite, në varësi si kanë shkuar ato gjyqe. Momentalisht komisariatet nuk i mbajnë dot, ka një mbingarkesë aty dhe parkohen në Kinostudio, buzë “Marubit”, që sa herë që ka një festival filmi, apo qoftë dhe kalimi i autobusëve dhe i mjeteve, duket si një zonë lufte”, tha Veliaj.
Sipas kryebashkiakut, bëhet fjalë për të hequr nga Tirana edhe ato makina që mund t’iu jetë bërë pluhuri nga 3 gisht dhe nuk i del njeri për zot sepse o janë braktisur, ose mund të jenë në emigracion, dhe rrinë poshtë pallateve.
