Çdo qytetar shqiptar mund të pajiset edhe me letërnjoftim digjital, përveç kartës fizike. Ministria e Brendshme ka hedhur për konsultim publik disa ndryshime në ligj.
“Letërnjoftimi mund të jetë në formë elektronike ose dixhitale. Në çdo rast, shtetasit mund të zgjedhin për t’u pajisur me një nga format e letërnjoftimit, ose mund të pajisen njëkohësisht me letërnjoftimin në të dy format”, shkruan Ministria e Brendshme.
Propozimi për kartë digjitale vjen si rezultat i përafrimit të legjislacionit shqiptar me atë të BE-së.
“Miratimi i këtij projektligji, do të përmbushë objektivat e qeverisë në drejtim të identitetit digjiital, duke standardizuar identifikimin e qytetarëve në nivel evropian dhe implementuar një identitet digjiital të përbashkët, i cili mund të lehtësojë komunikimin dhe bashkëpunimin me institucionet dhe bizneset evropiane. Gjithashtu, një identitet dixhital i përbashkët gjithashtu mund të ndihmojë në luftën kundër krimit të organizuar dhe mashtrimeve”.
Pra nëse e harron kartën në shtëpi apo të humbet portofoli, mjafton të kesh telefonin me vete, pa të cilin vështirë se del dikush nga shtëpia dhe kartën e ke edhe aty.
Kur këto ndryshime të ligjit të hyjnë në fuqi, nuk do të heqin vlefshmërinë e kartave aktuale.
