Rusia dhe Ukraina kanë shkëmbyer sulme të njëpasnjëshme në zonat kufitare. Ministria ruse e Mbrojtjes bëri të ditur se 10 predha ukrainase dhe një raketë Tochka-U u hodhën mbi rajonin e Belgorodit dhe dy raketa të tjera duke përfshirë një Patriot mbi rajonin fqinj Kursk.
Bombardime të rënda u raportuan në komunitetin e Kozinka ndërsa rreth 9,000 fëmijë do të evakuohen nga qyteti kufitar rus i Belgorodit dhe nga disa rrethe në rajonin e gjerë të Belgorodit. Dhjetë shtëpi, një shkollë dhe një çerdhe pësuan dëmtime. Njoftimi erdhi një ditë pasi presidenti rus Vladimir Putin tha se Kremlini dëshiron të krijojë një zonë tampon për të mbrojtur rajonet kufitare nga sulmet me rreze të gjatë ukrainase dhe bastisjet ndërkufitare.
Gjithashtu sulmet intensive ruse në rajonin kufitar verilindor të Ukrainës, Sumy, kanë nxitur një urdhër për evakuime masive. Guvernatori i rajonit të Saratovit, Roman Busargin, tha se dy dronë të lëshuar nga Ukraina u kapën pranë qytetit të Engels ku Rusia ka një bazë ushtarake strategjike bombarduese.
Nga sulmet një person u vra dhe 11 të tjerë u plagosën ndërsa dëmet janë të konsiderueshme. Gjithsej 16 persona janë vrarë dhe 98 janë plagosur këtë javë nga sulmet e njëpasnjëshme. Presidenti i Ukrainës, Volodymyr Zelenskiy dënoi sulmet e vazhdueshme terroriste, si dhe theksoi se mbrojtja ajrore mbetet shqetësimi kryesor i Ukrainës. Rusia ka lëshuar 130 raketa të llojeve të ndryshme, më shumë se 320 drone sulmuese Shahed dhe pothuajse 900 bomba ndaj Ukrainës deri më tani këtë muaj.
Ndërkaq Sekretari amerikan i Mbrojtjes Lloyd Austin paralajmëroi se mbijetesa e Ukrainës ishte në rrezik dhe u përpoq të bindte aleatët se Shtetet e Bashkuara ishin të përkushtuara ndaj Kievit, edhe pse Uashingtonit në thelb i kanë mbaruar paratë për forcat ukrainase. Kryetari republikan i Dhomës së Përfaqësuesve, Mike Johnson po refuzon të thërrasë një votim për një projekt-ligj që do të siguronte 60 miliardë dollarë më shumë për Ukrainën dhe Shtëpia e Bardhë po përpiqet të gjejë mënyra për të dërguar ndihmë në Kiev.
