Dy ditë më parë, në mediat ndërkombëtare qarkulloi lajmi se dhëndri i ish-Presidentit Donald Trump, Jared Kushner do të investojë në Shqipëri dhe Serbi. Vetë Kushner postoi foto nga projektet për Sazanin dhe Zvërnecin ku do të ndërtohen resorte turistike.
Kryeministri Edi Rama, gjatë Asamblesë Kombëtare të PS, foli për investimin që Kushner kërkon të bëjë në vendin tonë. Duke iu përgjigjur akuzave për shitjen e pasurive kombëtare, Rama tha se Sazani nuk do të shitet, por pretendoi se Kushner do ta kthejë atë në “xhevahir të Mesdheut”.
Rama tha se po flasim për një zonë të mbrojtur që nuk ka qenë kurrë e tillë.
“Atyre që thonë po shisni pasuritë te 5 oligarkët. Po shishni Sazanin tek të huajt. U them jo. Gaboheni. Në Shqipëri nuk janë 5 po qindra investitorë vendas. Këto ditë dhëndri i Donald Trump shpalli ambicien për të investuar në Shqipëri. Sot flasin për rrezikun që i kanoset Sazanit për ta kthyer në një xhevahir në Mesdhe. Flasin për një zonë të mbrojtur që e mbrojtur nuk ka qenë kurrë veç mbrojtjes nga ushtarët. Hija e ish-presidentit amerikan dhe frika provinciale nga zemërimi i tij.
Ju kujtohet se cfarë thoshin për mua kur u zgjodh por ja ku jam sot. Për mua djalin e paudhë që doli nga thesi i parave të Sorosit. Zbarkimi në Sazan i firmës më prestigjoze të firmës së hotelerisë në botë, Aman, që ka ndërtuar një dyzinë në zonat përrallore të UNESCO-s në Azi dhe Lindjen e Mesme”, tha ai.
