Krijuesit italianë të mediave sociale së shpejti mund të jenë të detyruar të zbatojnë të njëjtat rregulla si mediat tradicionale kur postojnë përmbajtjen e tyre në internet. Aktivitetet e influencuesve do të jenë nën mbikëqyrjen e Autoritetit Italian të Komunikimit (AGCOM).
Rregullat fillimisht do të zbatohen për krijuesit e përmbajtjes me më shumë se një milion ndjekës.
“Perëndimi i egër i blogerëve ka mbaruar.”, tha shefi i AGCOM, Giacomo Lasorella.
“Ne po fillojmë me të mëdhenjtë, por edhe influencuesit e tjerë do të duhet të përshtaten”, tha ai për gazetën La Repubblica.
Influencuesit e shquar do të përballen me gjoba të mëdha nëse nuk etiketojnë qartë bashkëpunimet e markave ose nuk zbulojnë interesat e tyre komerciale. Udhëzimet e propozuara synojnë gjithashtu të mbrojnë fëmijët, do të ketë dënime të ashpra për ndikuesit që nuk arrijnë të reklamojnë saktë bashkëpunimin e tyre me një markë dhe interesat e tyre komerciale, me gjoba deri në 250,000 €.
Shumë e shohin vendimin e AGCOM si të lidhur me skandalin që përfshiu blogeren e famshme italiane Chiara Ferragni.
Në dhjetor, zonja Ferragni, e cila ka pothuajse 30 milionë ndjekës në Instagram u gjobit me 1.075 milionë euro për pretendimin se shitja e një torte Krishtlindjesh rozë do të ndihmonte në financimin e një spitali për fëmijë në Torino. Në realitet, prodhuesi i tortës i kishte dhënë para spitalit disa muaj para nxjerrjes së tortës.
Javën e kaluar, policia italiane njoftoi se zonja Ferragni do të hetohej zyrtarisht për mashtrim në lidhje me rastin e tortës së Krishtlindjes ose pandoros. Rregulla më të rrepta për influencuesit u vendosën në vendet e tjera evropiane vitin e kaluar.
Në qershor, Franca miratoi legjislacionin që thotë se ndikuesit mund të përballen me burgim nëse zbulohet se kanë thyer rregulloret e reja të promovimit.
Dhe në tetor, Komisioni Evropian njoftoi se do të rrisë kontrollin e praktikave të biznesit dhe aktiviteteve të ndikuesve, duke deklaruar se krijuesit e përmbajtjeve dixhitale do të duhet të “ndjekin praktikat e drejta tregtare dhe ndjekësit e tyre kanë të drejtë për informacion transparent dhe të besueshëm”.
