Ka një sërë udhëtimesh dhe aktivitetesh që e kthejnë dimrin në stinën e preferuar të shumë personave. Por për ata që zgjedhin të udhëtojnë shumë në dimër, sidomos në vende malore dhe me borë, por edhe për ata që përdorin çdo ditë një automjet për nevojat e përditshme, ngarja e një makine në dimër është sa komode aq edhe e rrezikshme.
Kjo sepse ardhja e dimrit bashkë me temperaturat e ftohta bën që drejtimi i automjeteve si dhe mirëmbajtja e tyre, të jetë një sfidë më vete për shoferët.
Sot në “7pa5” ka qenë i ftuar eksperti i sigurisë rrugore, Arben Luzi.
Mes shumë këshillave për kujdesin me gomat dimërore, antifriza, shmangien e lëvizjeve të kota në zona të rrezikshme, frenat dhe shërbimet e tjera, eksperti tha se sipas tij, vrasësi kryesor është përdorimi i celularit gjatë drejtimit të mjetit.
“Aparati celular është vrasësi kryesor sot për sot, sot. Telefoni celular është jo vetëm për drejtuesin e mjetit, por për të gjithë dhe për këmbësorët. Unë mund të bëhem vrasës nga telefoni celular
Një njeri që merret me aparatin celular dhe përfundon në aksident, nuk mund ta vërtetojmë që po merrej me celularë gjatë aksidentit. Nga ana e shkeljes që ka bërë drejtuesi i mjetit është shumë e thjeshtë në kodin rrugor, por në realitet është mjaft e dhimbshme“, shprehet eksperti Arben Luzi.
Ndër të tjera, Luzi u ndal edhe te rëndësia që duhet t’i japim edukimit të fëmijëve për rregullat e qarkullimit rrugor.
“Aksidentet me këmbësorë janë përgjithësisht me moshat e treta, pasi nuk janë mësuar me rregullat e qarkullimit, janë rritur pa semafor, kur kalonin 5 makina në rrugë. Prandaj edukimi për rregullat e qarkullimit është shumë i rëndësishëm të futet që në kopsht dhe shkollë“, përfundoi eksperti.
