Prej disa ditësh stuhia “Ciaran” ka prekur disa vende të Europës Perëndimore dhe ka shkaktuar dëme katastrofike, deri në viktima e shkatërrime.
Raportohet se kjo stuhi do të vijë edhe në Shqipëri, duke nisur nga pasditja e kësaj të premteje.
Sinoptikanja Lajda Porja tha se më së shumti do të preket qarku i Shkodrës, Tiranës, Elbasanit, zona e Krujës.
Ajo deklaroi për mediat se më pas reshjet e dendura do të zbresin në Vlora dhe Gjirokastër, ndërsa ditën e nesërme do të preket qarku i Korçës.
“Kemi qarkun e Shkodrës, Tiranë, Elbasan, zonën e Krujës, më pas do të zbresin dhe Vlora dhe Gjirokastra do të marrin sasi reshjesh të konsiderueshme dhe ky sistem pritet që nesër të zhvendoset në qarkun e Korçës. Të gjithë zonat e Shqipërisë do të marrin reshje me sasi të konsiderueshme, duke filluar që sot pas mesditës dhe të paktën deri ditën e Dielë ku do të ketë dobësim të reshjeve”, u shpreh sinoptikanja.
Lajda Porja theksoi se do të ketë stuhi të forta ere, me shpejtësi që kalon 70-75 km/h, duke sjellë probleme, sidomos në trafikun detar.
Sipas saj, era do të mbetet e fortë deri paraditen e të dielës, ndërsa edhe java tjetër do të ketë mot të paqëndrueshëm./ CNA
