“Fronet” e pushtetit vendor janë ambicia e rreth 140 kandidatëve në garë në 14 maj. Beteja më e ashpër pritet të jetë në qarqet dhe qytetet më mëdha, ku edhe numri i kandidatëve është më i lartë. Nga emrat e regjistruar në fletën e votimit, qarqet me numrin më të madh të garuesve janë:
Vlorë
Gjirokastër
Tiranë
Elbasan
Shkodër
Fier
Bashkia më e lakmuar është kryeqyteti. Në garë për Tiranën janë 6 emra, ndonëse beteja është fokusuar mes dy fronteve, socialistëve me Erion Veliajn dhe koalicionit “Bashkë Fitojmë” me Belind Këllicin. Më pas vjen Bashkia e Sarandës, të cilën e synojnë 4 kandidatë.
Partia Demokratike, më e madhja opozitare, për herë të parë shkon në garë as me një gjysmë skuadre. Kryetari i Komanduar Enkelejd Alibeaj mundi të sigurojë kandidatë vetëm për 14 bashki.
BASHKITË KU KANDIDON PD
TIRANË
VAU I DEJËS
DIBËR
DIMAL
POLICAN
KUCOVE
KRUJE
KELCYRE
TEPELENË
FINIQ
SARANDE
FIER
MALLAKASTER
PATOS
Për këto zgjedhje vendore, lanë Karrigen e deputetit edhe 4 ligjvënës.
KATËR DEPUTETËT QË LANË MANDATIN
BENET BECI – PS
BESJAN AJAZI –PS
LUCIANO BOCI – “BASHKE FITOJME”
ZEF HILA- “BASHKE FITOJME”
Në garën e 14 Majit, të pavarur janë vetëm dy kandidatë. Gjergj Merkuri synon të fitojë bashkinë e Sarandës, pavarësisht kundërshtimeve që PS pati për të. Madje depozitoi një ankimim në KAS, ku kërkonte mosregjistrimin e Mërkurit me argumentin se ka falsifikuar firmat. Gjithsesi, KAS e rrëzoi këtë ankimim duke i dhënë mundësinë të ketë emrin në fletën e votimit. Ndërsa Çlirim Hoxha synon bashkinë e Devollit.
Në kushtet kur PD zyrtare do të kandidojë vetëm në 14 bashki, në 47 bashkitë e tjera beteja është mes PS dhe koalicionit opozitar “Berisha-Meta”.
Në qarkun e Tiranës, përveç kryeqytetit, opozitarët i kanë sytë edhe nga Kavaja, i cili njihet si bastioni historik i së djathtës. Redjan Krali i PS kërkon një mandate të dytë, ndërsa Finsik Qosja i koalicionit “Bashkë Fitojmë” kërkon t’ja rikthejë opozitës.
Garë të fortë premton edhe kryeqendra e veriut, Shkodra e cila nuk ka lejuar deri më tani që asnjë socialist të depërtojë në zyrën e kryetarit të bashkisë. Me Benet Becin, që la mandatin e deputetit, Partia Socialiste kërkon të fitojë një shans.
Interesante pritet të jetë gara edhe në një tjetër qytet të madh, Elbasanin, mes Gledian Llatjes dhe Luciano Bocit, votat e të cilëve për herë të parë do të numërohen elektronikisht. Elbasani, pritet të njerrë kryebashkiakun e parë nga zgjedhjet e 14 Majit.
