Kur mbeten edhe pak orë nga përfundimi i afatit për dorëzimin e kandidaturave për drejtues të Prokurorisë së Posaçme kundër Korrupsionit dhe Krimit të Organizuar, në garë mbeten tre emra që deri më tani kanë shprehur edhe zyrtarisht dëshirën për të qënë pasues të Arben Krajës.
Adnan Xholi, kandidati i parë që theu akullin dhe kandidoi për kreun e SPAK, drejtoi për 7 muaj i komanduar ish-Prokurorinë për Krime të Rënda në vitin 2015.
Pas drejtimit të Krimeve të Rënda, Xholi u rikthye pranë Prokurorisë së Përgjithshme ku vijoi të qëndronte deri në Korrik të këtij viti kur iu bashkua SPAK.
Përballë tij është prokurori Edvin Kondili, i cili e ka nisur karrierën pranë ish-Prokurorisë për Krime të Rënda në vitin 2004 dhe e vijoi atë edhe në Prokurorinë e Posaçme, aktualisht ku mban detyrën e drejtuesit të seksionit për korrupsionin.
Nga ana tjetër, Altin Dumani, aktualisht zëvendës drejtues i Strukturës së Posaçme, prokuror në seksionin e krimit të organizuar, e ka nisur detyrën në 1999 si Oficer i Policisë Gjyqësore. Ai ka mbajtur detyrën si zëvendës drejtues i ish-Prokurorisë për Krime të Rënda dhe Prokurorisë së Tiranës.
Këshilli i Lartë i Prokurorisë do zgjedhw drejtuesin e ri të Prokurorisë së Posaçme në dy mbledhje që pritet të zhvillohen në Nëntor dhe mesin e Dhjetorit kur do intervistohen.
