Një në tetë persona që janë nën moshën 45 vjeç vuan nga tensioni i lartë dhe meshkujt janë 3 herë më shumë më të prirur për t’u prekur nga kjo sëmundje.
Shkaqet kryesore janë jeta sedentare, ushqimet jo të shëndetshme, përdorimi i duhanit, drogërave të ndryshme, por edhe pasojat postcovid.
“”Pandemia ka ndikuar në shfaqen e hipertensionit në moshë të re. Sot një në tetë individë që janë nën moshën 45 vjeç vuajnë nga hipertensioni dhe kjo është një këmbanë e madhe alarmi. Mosha më e re që ke mi hasur është 18 vjeç”,shprehet mjeku kardiolog Taulant Gishto.
Vrasësi i heshtur, siç e quajnë mjekët dëmton organet kryesore. Rreth 900 vdekje në vit shkaktohen nga hipertensioni.
“Hipertensioni prek të gjitha organet . Prek zemrën veshkat, enët e gjakut, etj”, tha ai.
Mjekët apelojnë që të rinjtë të bëjnë sa më shumë kontrolle rutinë, pasi kjo sëmundje vjen pa paralajmëruar.
“Moshat e reja që nuk kanë sëmundje një vizitë tek kardiologu. Një vizitë rutinë mund të nxjerrë në pah sëmundje që këta individë nuk e dinë. Nga 100 veta që janë me hipertension 50 nuk e dinë, pasi është një sëmundje që vjen pa trokitur”, u shpreh kardiologu.
Tensioni i lartë mjekohet, por duhet të bëhemi të vetëdijshëm për të parandaluar, duke ndryshuar stilin e jetesës.
