Atë që kemi parë në filma, mund ta shohim së shpejti në realitet. Për ta bërë këtë po punon kompania kineze e pajisjeve elektrike, Xpeng, e cila së fundmi testoi një model makine fluturuese në Dubai, Emiratet e Bashkuara Arabe.
Nuk mund të përcaktohet saktësisht se çfarë është ky mjet, por mund të themi se është përzierje e aeroplanit dhe automjetit dhe synimi i saj është të shmangë trafikun për udhëtimet ndërmjet qyteteve në vendet me trafik të rënduar.
Sipas CNBC, mjeti me emrin X2 mund të transportojë dy pasagjerë, fuqizohet nga një grup prej tetë helikash dhe mund të arrijë shpejtësi deri në 130 km/orë. Makina është plotësisht elektrike dhe emeton zero karbon, pra nuk shkakton ndotje. Ajo mund të mbajë deri në 500 kg.
“Makina fluturuese është një artikull luksi dhe shumë individë me pasuri të lartë janë në kërkim të teknologjisë dhe produkteve të tilla. Dubai është vendi ku ne kemi klientë,” tha drejtori ekzekutiv për zyrat ndërkombëtare në Dhomën e Tregtisë dhe Industrisë në Dubai, Omar Abdulaziz Alkhan.
