Teleskopi hapësinor James Webb sjell imazhe të reja nga zemra e Mjegullnajës në Yjësinë e Orionit. Kjo është një zonë në kozmos ku krijohen yje, dhe është më e afërta me Tokën, rreth 1350 vite dritë larg nesh.
Imazhet e shkrepura janë më të qartat deri më sot dhe këto vrojtime të reja ndihmojnë për të kuptuar më mirë se si yjet me dendësi të lartë krijojnë një re me pluhura e gazra, në të cilat kanë lindur.
Yjet e rinj çlirojnë sasi të larta me radiacione ultraviolet direkt në mjedisin ku lindin dhe kjo gjë ndryshon formën fizike dhe përbërjen kimike të resë.
Mjegullnaja Orion përbën interes të madh për astronomët si objekt studimi sepse është e ngjashme me djepin ku është krijuar Sistemi Diellor rreth 4.5 mld vite më parë. Analogjia mund të ndihmojë për të kuptuar historinë e evolucionit planetar në një mln vitet e para të jetës.
Për studimin e këtij projekti po punojnë rreth 100 shkencëtarë nga 18 vende të ndryshme të botës.