Miliarda kartëmonedha dhe monedha anembanë botës që shfaqin portretin e Mbretëreshës Elizabeth II do të zëvendësohen pas vdekjes së saj.
Për gati 70 vjet, imazhi i Mbretëreshës është shfaqur në monedhat e Mbretërisë së Bashkuar, me portrete të ndryshme të profilit të saj teksa plaket. Ajo u shfaq në kartëmonedhat e vendit për më shumë se 60 vjet. Portreti i saj shfaqet gjithashtu në monedhën e disa vendeve që më parë ishin nën sundimin britanik.
Që nga viti 1953, një vit pasi mbretëresha mori fronin, monedhat e Mbretërisë së Bashkuar kanë mbajtur pesë versione të ndryshme të portretit të saj. Ajo u shfaq në kartëmonedhat e vendit duke filluar nga viti 1960.
Por tani, Banka e Anglisë, e cila shtyp kartëmonedhat e vendit, përballet me detyrën e madhe për të tërhequr atë monedhë nga qarkullimi dhe për ta zëvendësuar atë me para që mbajnë portretin e mbretit Charles III.
Ka më shumë se 4.7 milionë kartëmonedha në qarkullim në Mbretërinë e Bashkuar, me vlerë kolektive 82 miliardë paund (95 miliardë dollarë), sipas bankës qendrore. Ka gjithashtu rreth 29 miliardë monedha që qarkullojnë, tha Royal Mint.
Paratë e reja ka të ngjarë të futen gradualisht dhe do të bashkëjetojnë si kurs ligjor me kartëmonedhat dhe monedhat e vjetra për një periudhë kohore.
Por nuk janë vetëm paratë që do të kërkojnë një ndryshim. Mbretëria e Bashkuar përballet me një operacion të madh për të ndryshuar shenjat mbretërore në mijëra kuti postare dhe pasaporta të sapo lëshuara.
