Ish-kreu i Policisë së Shtetit Gledis Nano që u largua nga detyra të mërkurën pas vendimit të Këshillit të Ministrave, ka shpërndarë një letër publike ku ka shprehur mirënjohjen dhe falenderuar të gjithë bashkëpunëtorët e tij.
Nano ndër të tjera citon edhe një thënje të Shimon Peres, një nga mendjet më të ndritura të politikës botërore, ku shkruan se “Gjëja më e rëndësishme në jetë është të guxosh. Gjëja më e ndërlikuar në jetë është të kesh frikë. Por, më e zgjuara në botë është përpjekja për të qenë një person me moral”.
“Askush nuk mund ta ndërtojë personalitetin e tij nëpërmjet postit që mund t’i ofrohet! Për cilindo këto janë periudha të përkohshme që nëse arrin ta mbyllë më nder dhe vlerësim që nga qytetari më i thjeshtë, deri tek partnerët më strategjikë, atëherë çdokush prej nesh ka fituar vetveten. Në mënyrë të veçantë, postet drejtuese janë dhe do të mbeten një provë karakteri për të gjithë ata që marrin përsipër detyrat e vështira dhe me përgjegjësi të lartë shoqërore. Ajo që ka një rëndësi parësore në këtë aspekt është ruajtja e tipareve identifikuese, thënë më qartë, mostjetërsimi dhe qëndrueshmëria mbi parimet”.
Në përfundim të letrës së tij Gledis Nano i ka uruar suksese pasardhësit të tij, në detyrën që do të marrë. Po ashtu nuk ka harruar që të falenderojnë partnerët ndërkombëtarë, median dhe familjen që i kanë qëndruar pranë në karrierën e tij në polici. Tashmë Gledis Nano pas largimit nga posti i drejtorit të përgjithshëm, i dha fund karrierës së tij në radhët e uniformave blu.
