Eksperti i ekonomisë, Fatos Çoçoli thotë se Shqipëria, por edhe vende të Bashkimit Evropian po përballen me një krizë të rëndë energjitike.
Në një intervistë për “Euronews Albania”, Çoçoli theksoi se mund të përballemi me ndërprerje të forta të energjisë.
“Kemi përpara realisht një krizë të rëndë energjitike. Mund të jemi të detyruar të kemi edhe ndërprerje të forta të energjisë. Jo vetëm ne, por edhe vendet e Bashkimit Evropian. Të gjitha këto do të na vijnë si problematike të jashtëzakonshme. Duhet të jemi të përgatitur.
Po ta kishim TEC-in e Vlorës, që edhe ndot do të ishte gjysma e së keqes. Do kishim energji në nivelin 140-150 euro për megavat orë. Problematika jonë kryesore është që nuk kemi ujë mjaftueshëm në basene, për të përballuar të paktën 60% të nevojave tona”, u shpreh eksperti.
Qeveria shqiptare i ka kaluar një fond me vlerë 70 milion euro Korporatës Elektroenergjitike Shqiptare për të siguruar energjinë në muajin gusht.
Çmimet e energjisë në bursa kanë arritur në nivelet më të larta të këtij viti, duke kapur një vlerë mesatare prej 500 euro për mëgavat orë dhe mbi 600 euro në periudhën e pikut të kërkesës.
KESH është detyruar që të anullojë dy herë procedurën për blerjen e energjisë elektrike gjatë javës së fundit, për shkak të çmimeve të shtrenjta.
