Konfindustria ka reaguar sërish për çmimin e lartë të naftës dhe i kërkon qeverisë që të ndryshojë përbërjen e Bordit të Transparencës, duke përjashtuar përfaqësuesit e operatorëve të karburanteve si anëtarë me të drejtë vote në vendimmarrje.
Sipas Konfindustrisë, “Është e papranueshme dhe tërësisht e paarsyeshme, që vendimmarrjet të përcaktohen pikërisht edhe nga subjektet, që duhet të jenë objekt vëzhgimi për spekulime të mundshme në treg dhe për të cilët përligjet qëllimi i krijimit të vetë Bordit të Trasparencës”.
Mungesa e anëtarëve të pavarur dhe profesionistë, sipas Konfindustrisë, krijon hapësirë për interpretim të pasaktë dhe korrupsion të tipit “kapje e shtetit”.
Gjithashtu ka dyshime për fshehje fiskale dhe kontrabandë në vlerë qindra milionë euro/vit në tregun e karburanteve. Çmimi i lartë i karburanteve në vend pritet të sjellë pasoja shkatërruese për ekonominë, biznesin dhe qytetarët.
Konfindustria kërkon edhe njëherë ndërhyrjen e menjëhershme të qeverisë për lehtësimin e ngarkesës fiskale me qëllim uljen e çmimit të karburanteve.
Gjithashtu vlerëson se është domosdoshmëri krijimi i Entit Rregullator të Karburanteve si institucion në varësi të Kuvendit.
