Pandemia e Covid-19 është zbutur në pjesën më të madhe të botës dhe, bashkë me të, shumë nga kufizimet sociale të zbatuara për të frenuar përhapjen e saj.
Por në vend të Covid janë shfaqur një sërë virusesh që sillen në mënyra të reja dhe të çuditshme.
Merrni shembull gripin që pothuajse u zhduk gjatë dy viteve të para të pandemisë. Megjithatë, rastet u rritën në shkurt dhe vazhduan më tej në pranverë dhe verë pasi kufizimet e Covid u hoqën.
Dhe gripi është vetëm fillimi.
Virusi sincicial i frymëmarrjes, një virus i ngjashëm me të ftohtin, i zakonshëm gjatë muajve të dimrit, shfaqi një rritje verën e kaluar, me raste në rritje te fëmijët në Evropë, SHBA dhe Japoni. Më pas, në janar të këtij viti, një shpërthim i adenovirusit 41, zakonisht përgjegjës për sëmundjet gastrointestinale, u bë shkaku i dukshëm i një sëmundjeje misterioze dhe të rëndë të mëlçisë tek fëmijët e vegjël.
Dhe tani, një shpërthim i fundit i lisë së majmunëve, një infeksion i rrallë viral që zakonisht gjendet në Afrikën Qendrore dhe Perëndimore, po i huton ekspertët e shëndetit me mbi 1000 raste të konfirmuara dhe të dyshuara që shfaqen në 29 vende jo-endemike.
Kufizimet zvogëlojnë ekspozimin, imunitetin
Një shpjegim për përhapjen masive të viruseve, është se kufizimet nga Covid dhe mbajtja e maskave gjatë dy viteve të fundit u kanë dhënë sëmundjeve të tjera infektive pak mundësi për t’u përhapur.
Tani, ndërsa kufizimet e shkaktuara nga pandemia janë lehtësuar dhe jeta e përditshme ka rifilluar, viruset që ishin në tërheqje kanë gjetur një terren për t’u zhvilluar.
