Ushtrimet apo palestra mund të jenë më mirë për gratë në mëngjes nëse duan të djegin yndyrën, ndërsa burrat përfitojnë më shumë nga stërvitja gjatë darkës.
Një seancë fitnesi në mëngjes është më e mirë për gratë që kërkojnë të reduktojnë yndyrën dhe të humbasin centimetra në bark. Kështu thotë një studim i vogël. Vihet re gjithashtu një ulje më e madhe e presionit të gjakut nga stërvitja herët gjatë ditës.
Por presioni i gjakut i meshkujve, nivelet e kolesterolit dhe aftësia e tyre për të djegur dhjamin duket se përfitojnë më shumë nga stërvitja në mbrëmje.
Burrat gjithashtu mund të ndihen më pak të lodhur duke u ushtruar në darkë, sesa në mëngjes.
Rezultatet vijnë nga një studim i 27 grave dhe 20 burrave që stërviteshin katër herë në javë.
Studimi, duke përfshirë njerëz relativisht të aftë të moshës 25 deri në 55 vjeç, zbuloi se gratë që ushtroheshin në mëngjes humbën mesatarisht 10 për qind të yndyrës në belin e tyre. Kjo krahasuar me vetëm 3 për qind të yndyrës së barkut të humbur te gratë që ushtroheshin në mbrëmje.
Femrat që ushtroheshin në mëngjes panë një ulje më të madhe të presionit të gjakut sesa ato që ushtroheshin më vonë gjatë ditës. Kjo mendohet të jetë shkaktuar nga një reduktim në ngurtësinë e enëve të tyre të gjakut.
Të gjithë burrave dhe grave të studiuara iu kërkua të bënin katër seanca ushtrimesh në javë për 12 javë. Këto përfshinin një seancë trajnimi me rezistencë, një seancë joga ose pilates dhe një seancë stërvitje në sprint, që nënkuptonte kryerjen e një ushtrimi si noti ose vrapimin për 35 minuta. Shumica e seancave zgjatën një orë, megjithëse ushtrime më të gjata aerobike si çiklizmi u përfshinë për të testuar qëndrueshmërinë.
Të gjithë njerëzve në studim iu dha një dietë fikse për 12 javë, në mënyrë që konsumimi i ushqimit të mos ndikonte tek rezultatet.
Dihet mirë se ushtrimet ndikojnë ndryshe tek gjinitë, veçanërisht në lidhje me yndyrën.
Hormonet e grave dhe ritmet e kundërta cirkadiane mund të luajnë gjithashtu një rol.
Studimi, i cili është botuar në revistën Frontiers in Psychology, zbuloi se nga ushtrimet në përgjithësi kanë përfituar të gjithë ata që morën pjesë në studim, pavarësisht se kur u stërvitën.
Gjetjet e këtij studimi tregojnë se gratë duhet të ushtrohen në mëngjes për të humbur yndyrën, por në mbrëmje nëse duan të përmirësojnë forcën e muskujve.
