Duke filluar nga e mërkura 1 qershor, nga tregu do të hiqen qeset plastike që janë përdorur deri më sot.
Projektligji i miratuar nga qeveria në mars të këtij viti ndalon prodhimin, përdorimin dhe importimin e qeseve njëpërdorimëshe. Në bazë të nenit të miratuar shkeljet e ligjit e dënojnë çdo person që hedh në treg qeset e tilla me gjobë 1 milion deri në 1.5 milionë lekë.
“Çdo person që hedh në treg, prodhon apo importon në territorin e Republikës së Shqipërisë qese plastike mbajtëse, qeseve të lehta plastike mbajtëse, qeseve shumë të lehta plastike mbajtëse, si dhe qeseve plastike mbajtëse të oxo-degradueshme apo oxo-biodegradueshme, sipas nenit 29 të ligjit dënohet me gjobë nga 1 milion deri në 1.5 milionë lekë”, thotë ligji.
Në vend të qeseve plastike do të përdoren trastat. Ndërsa ligji në fjalë është kundërshtuar nga prodhuesit të cilët paralajmërojnë se do të ketë rënie të punësimit në industritë e prodhimit të qeseve.
