Në vendin tonë nuk ka asnjë rast me linë e majmunit e cila ka vënë në alarm Organizatën Botërore të Shëndetësisë.
“Nuk ka vend për panik në popullatë sepse transmetimi është me anë të kontaktit shumë të ngushtë fizik, qëndrimi në distancë shumë të afërt dhe prekjen e objekteve të kontaminuara. Rreziku është shumë i ulët”.
Sipas epidemiologut Artan Simaku, ISHP por edhe mjekët e kanë mundësinë e diagnostikimit të lisë së majmunit.
“ISHP ka të gjitha kapacitetet për realizimin e diagnozës dhe është vendosur vëzhgimi i përforcuar në gjithë sistemin parësor për evidentimin e rasteve të dyshuara”.
Por cilat janë simptomat dhe si kurohet kjo sëmundje?
“Fillon me temperaturë, ka rritje të gjëndrave limfatike, pastaj fillon të shfaqet në lëkurë, fillon në fytyrë, pëllëmbët e duarve dhe shputat e këmbëve dhe pastaj në gjithë trupin”.
Transmetimi nga njeriu tek njeriu që ndodh për herë të parë, e ka venë këtë sëmundje infektive në qendër të vëmendjes së shëndetësisë botërore. Deri më tani është përhapur në 30 shtete të botës, ende nuk dihet roli i transmetimit në rrugë seksuale. Lija e majmunit zgjat rreth 4 javë dhe zakonisht ajo kalon lehtë.
