Përhapja e lisë së majmunit në Evropë po bëhet gjithnjë e më shumë shqetësuese, teksa vetëm ditën e sotme në Britaninë e Madhe janë identifikuar 36 raste të reja.
Drejtuesit e Agjencisë së Sigurisë Shëndetësore në Mbretërinë e Bashkuar (UKHSA) kanë regjistruar tashmë 57 raste në pak më shumë se dy javë, në një situatë të përshkruar si ‘të paprecedentë’ nga ekspertët kryesorë.
Rastet janë identifikuar në meshkujt me prirje homoseksuale dhe biseksual, teksa zyrtarët shëndetësorë bënë apel për kujdes të shtuar, edhe pse sipas tyre rreziku për popullsinë në Mbretërinë e Bashkuar mbetet i ulët.
E gjitha kjo vjen në një kohë, kur në Britani po diskutohet nëse sistemi shëndetësor ka aftësinë ta përballojë një fluks në rritje, teksa ekspertët thonë se spitaleve mund të mbesin pa shtretër së shpejti nëse shpërthimi vazhdon të përkeqësohet.
Udhëzimi aktual i UKHSA thotë se të gjitha rastet e konfirmuara që kanë nevojë për kujdes spitalor duhet të transferohen në njësitë e sëmundjeve infektive me pasoja të larta (HCID). Vetëm 15 shtretër të tillë ekzistonin në të gjithë Mbretërinë e Bashkuar përpara se të godiste Covid. Kapaciteti u rrit gjatë pandemisë, por burime brenda shërbimit shëndetësor thonë se ai ende ka vetëm 50 shtretër.
