Instituti i Gjeoshkencave ka bërë një sqarim në lidhje me raportimin e ngjarjeve sizmike.
Në një njoftim në faqen zyrtare, IGJEO sqaron se vlerësimi paraprak kryhet nga sistemi i shpejtë dhe mund të ketë ndryshim në vlerë nga vlerësimi final. Por, në çdo rast, nuk korrigjohet magnituda, por rivlerësohet nga personeli në detyrë, për të dhënë vlerën finale përfaqësuese!
“Duke marrë shkas nga disa raportime në disa portale, sqarojmë se:
IGJEO ka detyrë të raportojë me saktësi, por mbi të gjitha, në kohën më të shpejtë të mundshme lokalizimin dhe magnitudën e çdo ngjarje sizmik me impakt!
Nga Qendra Kombëtare e Monitorimit Sizmik, raportimi i magnitudës kryhet në dy etapa, ai paraprak i shpejtë dhe më pas vlerësimi përfundimtar. Vlerësimi paraprak kryhet nga sistemi i shpejtë dhe mund të ketë ndryshim në vlerë nga vlerësimi final. Në çdo rast, nuk korrigjohet magnituda, por rivlerësohet nga personeli në detyrë, për të dhënë vlerën finale përfaqësuese! Kjo procedurë është standard ndërkombëtar për fushën e sizmologjisë!
Në lajmërimin e parë në webin e IGJEO, është vendosur termi “paraprake” që nënkupton se ngjarja është duke u rivlerësuar dhe parametrat janë subjekt ndryshimi.
Faleminderit për mirëkuptimin!”, thuhet në njoftim.
