Nga 1 Qershori, të gjithë shtetaist shqiptarë që jetojnë në Gjermani, mund të konvertojnë patentën shqiptare me atë gjermane pa iu nënshtruar testimeve përkatëse. Marrëveshja mes dy vendeve është nënshkruar nga ministrja e infrastrukturës, Belinda Balluku dhe ambasadori gjerman Peter Zingraf.
Sipas Ballukut, kjo marrëveshje tregon arritjet e Shqipërisë në këtë sektor.
Belinda Balluku: Është certifikim i një standardi që ne e kemi arritur si një vend që synon integrimin në BE. Është reformuar sektori i transportit në përputhje me direktivat e BE. Një rëndësi i kemi kushtuar modelit dhe prodhimit të lejes së drejtimit shqiptare me të gjithë elementët e sigurisë. Reformat krijuan besueshmëri të autoriteteve gjermane.
Për ambasadorin Zingraf, kjo marrëveshje është një sinjal i përafrimit të Shqipërisë me Europën si dhe do të ndihmojë në rritjen e punësimit për shqiptarët.
Peter Zingraf: Dimensioni më i rëndësishëm është ai i integrimit. Është një sinjal i rëndësishëm i përafrimit jo vetëm me Gjermaninë, por edhe me Europën. Si një hap i vogël në drejtim të Europës, kjo marrëveshje është pjesë e politikës së Gjermanisë, një politikë e hapur përkundrejt të gjitha vendeve të Ballkanit Perëndimor e cila do duhet të formësohet në mënyrë konkrete me nisjen e bisedimeve të anëtarësimit çka do të sillte përfarimin e mëtejshëm me BE dhe Gjermaninë në veçanti.
Nga viti 2019-2021 mbi 15 mijë shtetas shqiptare kanë konvertuar lejen e drejtimit tek vendet ku jetojnë dhe punojnë. Aktualisht patentat shqiptare njihen dhe konvertohen edhe në Itali, Greqi, Malin e Zi, Maqedoninë e Veriut, Kroaci, Kosovë, Serbi dhe Emiratet e Bashkuara.
