Pas 5 viteve të marrëdhënies së saj, Eliona Pitarka na njohu më në fund me bashkëshortin në ditën e dasmës. Në rrëfimin që ndan në “Shije Shtëpie” në Tv Klan për njohjen e tyre, aktorja tregon se dy gjërat e para që e bënë të dashurohej pas Desianit ishin vetëbesimi dhe zemërgjerësia.
Ndonëse ajo zgjodhi ta mbante larg syve të publikut dhe medias marrëdhënien gjatë viteve për të mos e përballur partnerin me to, duke qenë ajo figurë publike, ka pasur edhe momente kur gjërat janë vështirësuar. Eliona tregon episodin që thuajse e çoi drejt heqjes dorë nga televizioni, por ishte Desi ai që i ndryshoi mendjen.
Eliona Pitarka: Ai është njeri shumë mendjehapur dhe nuk ka asnjë lloj problemi, është shumë mbështetës dhe kjo është një ndër arsyet që ne kemi funksionuar që në fillimet tona. Desi vjen nga një familje intelektuale, është shumë mendjehapur, nuk ka asnjë kompleks, asnjë lloj problemi përveç faktit që nuk do të jetë në qendër të vëmendjes, çdo gjë tjetër për të është në rregull. Ai më ka mbështetur jashtëzakonisht shumë edhe në momentet e mia të këqija kur unë thoja “do ta lë televizionin fare”.
Katerina Trungu: Por, pse, mund të ndash ndonjë moment?
Eliona Pitarka: Presioni i shumtë që kam pasur dhe nga portalet. Ka qenë një periudhë diku para 4-5 vitesh, me thënë të drejtën, portalet edhe shpifin dhe ne e dimë këtë gjë. Lajme nga më të ndryshmet të cilat nuk janë të vërteta, unë nuk arrija ta pranoja dot këtë gjënë që kështu funksionon dhe duhet t’i futësh një mendje të lehtë sepse do të flasin, mirë apo keq. Ka qenë një periudhë që unë e kam përjetuar shumë keq, janë postuar disa lajme të rreme nëpër disa portale. Kanë qenë fillimet e mia të lidhjes me Desin dhe ai është treguar shumë mbështetës, shumë. Unë doja të hiqja dorë nga televizioni, doja të bëja një jetë të qetë, thosha nuk dua të më shohë askush kur dal, deri aty arrita, më dukej sikur më përndiqnin. Dhe më ka mbështetur jashtëzakonisht shumë, më ka bërë të eci përpara dhe të bëj gjëra edhe më të mëdha, kështu që mbështetja ime më e madhe është ai, absolutisht.
