Sikur të mos mjaftonin vetëm pasojat e luftës në Ukrainë, Shqipëria rrezikon të përballet edhe me një tjetër problematikë, atë të mungesës së ujit në hidrocentrale për të prodhuar energji me kapacitet të plotë.
Sipas të dhënave zyrtare të Korporatës Energjetike Shqiptare të publikuara më datë 15 Mars, niveli i ujit në Liqenin e Fierzës, i cili shërben edhe si rregullator i furnizimit me ujë për dy hidrocentralet e tjerë të ngritura në kaskadën e Drinit, atë të Vaut të Dejës dhe Komanit, ka zbritur në 161 metra, duke iu afruar nivelit kritik.
Situata bëhet edhe më problematike për shkak të prurjeve shumë të ulëta në kaskadën e Drinit. Sipas të dhënave zyrtare, prurjet në liqen janë 100 m2 në sekondë.
Mungesa e shirave dhe prodhimi i energjisë me kapacitet të plotë për plotësimin e nevojave në vend, ka bërë që niveli në basenin e Fierzës të pësojë një rënie me afro 7 metra vetëm në 3 javët e fundit ose 11 metra në 6 javë.
Kështu, më datë 21 Shkurt niveli në liqen ishte 266.6 metra, ndërsa në datë 31 Janar ishte 271 metra.
Hidrocentrali i Fierzës është prodhuesi më i madh i energjisë në vend, ndërsa niveli minimal i punës është 140 metra, ndërsa ai maksimal 296 metra.
