Nga nesër, 3 mars në vend nuk do të jetë më në fuqi ora policore, e cila u vendos për të kufizuar lëvizjet e qytetarëve në mënyrë për të ulur rrezikun e infektimeve. Vendimi mor sot nga Komiteti Teknik i Ekspertëve pas përmirësimit të situatës epidemiologjike.
Mjeku epidemiolog, Ilir Alimehmeti u shpreh se ky vendim është koherent me situatën ku ndodhemi.
Alimehmeti: Mund të kishte ardhur edhe disa javë më parë, të gjithë indikatorët tregonin rënie. Është koherent në këtë drejtim sepse problemi ka qenë, është dhe do të mbetet për çdo virus respirator kryesor grumbullimet e mëdha. U vu një theks sot që të kemi kujdes në këtë drejtim.
Mjeku shtoi se ka një rekomandim të drejtë për evitimin e grumbullimeve. Sipas tij, njerëzit duhet të ndërgjegjësohen dhe të kuptojnë se për disa persona, sidomos ata të paimunizuarit mund të mos jetë ende momenti për tu grumbulluar.
Alimehmeti: Grumbullimet do jenë një diskutim, por është një diskutim në rënie sepse gjithçka është në rënie të fortë, jo vetëm në Shqipëri por edhe në rajon, Evropë dhe është gjë shumë e mirë.
Si paraqitet situata në spitalin Covid?
Mjeku tha se numrat janë reduktuar edhe për sa i përket shtrimeve në spitale.
Alimehmeti: Numrat janë shumë të reduktuar. Shifra që u dha dje fliste për 45 persona të shtruar në spital, që është një shifër shumë e vogël. Përgjatë valës së Delta-Omicron se ka qenë kombinim i të dyjave, niveli më i lartë ka qenë 157, kështu që jemi me rëni 72% nga ajo shifër. Shkurti i vitit të kaluar kishte mbi 600 persona të shtruar në spitale.
Alimehmeti: Është diçka më shumë se gripi, megjithatë i është afruar shumë nga ky drejtim. Është shumë herë më i transmetueshëm se sa gripi. Gripi ka një koeficient 1.3-1.4 ndërsa varianti origjinal disa thoshin 2 disa 3.5. Disa shtete dhe studiues Omicronin po e krahasojnë me fruthin që është virusi më i transmetueshëm që ne njohim deri sot. Por nga ana e riskut për pacientin po sillet si gripi. Ka të bëjë dhe faktin që shumë persona e kanë kaluar më parë, variantet e mëparshme dhe shumë persona janë vaksinuar.
Sa i druhemi një varianti tjetër?
Alimehmeti: Mundësitë ekzistojnë. Gjithmonë ekziston një mundësi sepse në mjekësi nuk flitet asnjëherë me 0 dhe 100 %. Nuk ka, nuk është shkencë sigurie, është shkencë probabilitetesh. Mundësitë janë, por janë shumë të vogla.
Alimehmeti gjithashtu rekomandoi vaksinimin e fëmijëve me sëmundje të tjera. Sipas tij, është pozitive fakti që imuniteti natyror funksionon.
