Drejtuesit e mjeteve, krahas testit për përdorimin e pijeve alkoolike, do t’i nënshtrohen dhe një kontrolli nëse janë përdorues të lëndëve narkotike. Shefi i Sigurisë Rrugore, Skënder Ismaili, tha në Klan news se pajisjet janë shpërndarë efektivëve, dhe përdorimi i tyre do të nisë së shpejti.
“Janë futur në përdorimin e shërbimit të Policisë Rrugore dhe identifikohen persona që gjykohen nga ana e shërbimit policor që ndodhen nënë efektin e lëndëve narkotike”, tha ai.
Sipas Ismailit, dy muajt e parë të vitit u mbyllën me më pak aksidente, por disa shkelje vijojnë të jenë shqetësuese.
“Janë trefishuar, numri i konstatimit të shkeljeve që bëjnë që në orët e para të mëngjesit kanë qenë nën efektin e pijeve alkoolike” , tha ai.
Ditët e fundit policia rrugore ka nisur një fushatë sensibilizuese në shkolla mbi rregullat e qarkullimit.
“Njohja e sistemit të sinjalizimit rrugor ndikon pozitivisht në ecurinë e tyre në të ardhmen” , tha ai.
Gjatë javës që lamë pas, u pezulluan 441 leje drejtimi, u arrestuan 64 drejtues mjetesh si dhe u vendosën në total 15.439 masa administrative.
