Ka nisur tashmë faza e dytë e aplikimeve për kreditë e buta të strehimit në kryeqytet. Të gjithë individët e klasifikuar si fitues të fazës së parë kanë afro një muaj në dispozicion për të përgatitur dhe dorëzuar dosjen e dokumenteve të detyrueshme për këtë fazë, e cila është edhe vendimtare në klasifikimin e familjeve dhe individëve që do të përfitojnë nga programi i kredive të buta gjatë këtij viti. Drejtoria e Përgjithshme e Shërbimeve Sociale dhe ajo e Strehimit Social në Bashkinë e Tiranës kanë detajuar procedurën që duhet të ndjekin 2405 fituesit e shpallur në fazën e parë. Të gjithë këta fitues, sipas afateve të përcaktuara duhet që të dorëzojnë pranë Zyrës së Pritjes me Qytetarin në Bashkinë Tiranë, të gjithë dokumentacionin e vlefshëm ligjor për përfitimin e kredisë së butë.
Autoritetet e Bashkisë së tiranës bëjnë me dije se në fazën e dytë të aplikimeve do të mund të marrin pjesë e edhe të gjithë individët që në fazën e parë ishin jofitues, por të cilëve u janë pranuar ankimimet nga Bashkia e Tiranës.
“Afati për aplikim sipas kësaj thirrjeje për fazën e dytë përfundon në datën 21 mars. Dokumentacioni i parashikuar duhet të dorëzohet nga aplikanti fitues pranë Zyrës së Pritjes me Qytetarin në Bashkinë e Tiranës. Për efekt të zbatimit të këtij programi, do të konsiderohen të vlefshme dokumentet që janë lëshuar nga institucionet kompetente jo më vonë se 3 muaj nga data e lëshimit të dokumentit. Dosja ka vlefshmëri ligjore kur: dorëzohet dokumentacion origjinal ose dokumentacion i njësuar me origjinalin (me vulë të thatë), si dhe kur është dokumentacion i lëshuar përmes portalit e-albania (vulë elektronike). Gjithashtu në këtë fazë duhet të plotësojnë dhe dorëzojnë dokumentacionin e përcaktuar edhe individët që nuk janë shpallur fituese të fazës së parë, por kanë bërë ankimim pranë Bashkisë Tiranë dhe u është pranuar ankimimit”, sqarojnë autoritetet e Bashkisë së Tiranës.
Konkretisht në dosjen që duhet dorëzuar brenda datës 21 mars duhet të përfshini të gjithë dokumentet që konfirmojnë të dhënat personale të aplikantit, dokumentet për vërtetimin e kushteve të strehimit, për vërtetimin e kushteve familjare, ato që duhen për vërtetimin e kushteve sociale, kushteve ekonomike. Për të vërtetuar situata të caktuar është e nevojshme që përpos listës së përmendur më lart të paraqiten edhe një sërë dokumentesh të tjera që kanë të bëjnë me vërtetimin nga zyra përmbarimore për masën e pensionit ushqimor që përfiton sipas vendimit të gjykatës, pasqyrën financiare për vitin kalendarik të shkuar për personat e vetëpunësuar e njehsuar nga Drejtoria Rajonale Tatimore, vërtetimi nga zyra e punësimit për personat e regjistruar si punëkërkues, vërtetimi për personat që ndjekin studimet, vërtetimi mbi bazën e vlerësuar. Dosjen e plotë të dokumenteve që duhen në secilin e rast e gjeni të detajuar në vijim të shkrimit. Ndërkohë familjeve të cilat janë celebruar me shtetas të huaj ose individë të cilët kanë vendlindjen jashtë territorit të Republikës së Shqipërisë do t’u kërkohet vetëm dokumentacioni i siguruar nga Institucionet e Republikës së Shqipërisë.
Përzgjedhja e fituesve
Sipas procedurave të përcaktuara, pas përfundimit të shqyrtimit të aplikimeve komisioni në fjalë harton një Raportit Përmbledhës i cili i paraqitet në Këshilli Bashkiak, për miratimin e listave përfundimtare të përfituesve të programit social të strehimit “Subvencionimi i Interesave të Kredive”, i financuar me buxhetin e shtetit për këtë vit. Ndërkohë që edhe në këtë fazë të pakënaqurit do të mund të ankimojnë vendimin për mospërfitim. “Kundër vendimit të Këshillit Bashkiak për “Për miratimin e listave të përfituesve të programit social të strehimit “subvencionimi i interesave të kredive të buta”, i financuar me buxhetin e shtetit, mund të bëhet ankim në gjykatën kompetente”, sqarojnë zyrtarët e Bashkisë së Tiranës.
Sipas të dhënave të bëra publike më herët nga Bashkia Tiranë janë rreth 300 fituesit që do të mund të përfitojnë nga programi I strehimit social nëpërmjet kredive të buta. Programi i subvencionimit të interesave të kredisë synon të mbështesë në blerjen e shtëpive të para, me qëllim përmirësimin e kushteve të tyre të jetesës, nëpërmjet kredive hipotekore me kushte lehtësuese, e cila jepet për strehim dhe një pjesë e interesave subvencionohen nga Bashkia Tiranë.
DOSJA E PLOTË QË DUHET TË DORËZOJNË FITUESIT E FAZËS SË PARË:
Të dhëna personale të aplikantit:
Certifikatë e lindjes së aplikantit, me përjashtim të rasteve specifike kur individi/familja nuk ka regjistrim në gjendjen civile.
Vërtetim për vendbanimin në njësinë e vetëqeverisjes vendore, ku kërkohet strehimi social, për familjet që kanë lëvizur nga zona të tjera të vendit.
Për vërtetimin e kushteve të strehimit, sipas shkronjës “a”, të nenit 16, të ligjit nr. 22/2018, “Për strehimin social”:
Vërtetim nga Agjencia Shtetërore e Kadastrës për pronat që disponohen në emër të secilit anëtar të familjes ku vërtetohet se nuk kanë banesë, ose kanë një të tillë nën normat e strehimit; si edhe vërtetimin nga ky institucion për secilin nga anëtarët madhorë të familjes që nuk kanë kryer asnjë transaksion për tjetërsimin e pronësisë, të paktën në 5 vitet e fundit, përveç rastit kur pronësia mbi to ka humbur për shkak të një fatkeqësie (vdekje apo sëmundje e rëndë) ose force madhore.
Vërtetim nga zyra e regjistrimit të pasurive të paluajtshme për sipërfaqen e pronës, që zotëron familja apo ndonjë anëtar i saj, kur banesa është me sipërfaqe nën normat e strehimit në fuqi.
Vërtetim nga zyra e regjistrimit të pasurive të paluajtshme se nuk figuron e regjistruar asnjë pronë, e cila mund të përdoret edhe për strehim, për çdo anëtar të familjes, që kanë ndryshuar vendbanim për efekt punësimi
Aktverifikim nga njësia vendore për: banesat në rrezik shembjeje, rastet kur familja ka mbetur e pastrehë, si rezultat i fatkeqësive natyrore, si dhe banesat që prishen ose përjashtohen nga procesi i legalizimit.
Vendim i gjykatës për familjet që humbasin banesën për shkak të zbatimit të vendimit të gjykatës.
Akt i verifikimit nga njësia vendore për familjet rome/egjiptiane, që banojnë në banesa individuale ose struktura, të cilat nuk klasifikohen si banesë.
Për vërtetimin e kushteve familjare, sipas shkronjës “b”, të nenit 16, të ligjit nr. 22/2018,“Për strehimin social”:
Certifikatë familjare.
Vendim i gjykatës që i lë në ngarkim fëmijën ose fëmijët për çiftet e divorcuara.
Për vërtetimin e kushteve sociale, sipas shkronjës “c”, të nenit 16, të ligjit nr. 22/2018, “Për strehimin social”:
Vërtetim i komisionit mjekësor të përcaktimit të aftësisë së kufizuar për individë me aftësi të kufizuara.
Vërtetim përkatës nga institucioni ku ka qenë i strehuar dhe librezë e jetimit, dhënë nga institucioni shtetëror i autorizuar për individët me statusin e jetimit.
Dokument që vërteton se ka mbetur i pastrehë si rezultat i lirimit të banesave, ish-pronë e subjekteve të shpronësuara.
Dokument i lëshuar nga institucionet përkatëse shtetërore për personat që kanë statusin “emigrant”, “punëtor emigrant” dhe “azilkërkues”.
Dokument i lëshuar nga institucionet përkatëse shtetërore për familjet e punonjësve të rënë në detyrë, që u përkasin Policisë së Shtetit, Gardës së Republikës, Shërbimit për Çështjet e Brendshme dhe Ankesat në Ministrinë e Brendshme, Shërbimit të Mbrojtjes nga Zjarri dhe Shpëtimit, të Forcave të Armatosura, të Shërbimit Informativ të shtetit dhe të Policisë së Burgjeve.
Urdhër mbrojtjeje apo urdhër i menjëhershëm mbrojtjeje, lëshuar nga gjykata për viktimat e dhunës në familje.
Vetëdeklarim nëse individi/familja i përket pakicës kombëtare rome ose egjiptiane, dokument i lëshuar nga institucionet përkatëse për të miturit në konflikt me ligjin; vetëdeklarim se i përket grupimit LGBTI.
Vërtetim me certifikatë familjare se individi i përket kategorisë vajzë-nënë.
Për vërtetimin e kushteve ekonomike, sipas shkronjës “ç”, të nenit 16, të ligjit nr. 22/2018, “Për strehimin social”:
Vërtetim i të ardhurave neto të familjes ose një deklaratë me shkrim nga aplikuesi për të ardhurat e familjes dhe burimin e tyre, të cilat duhet t’i bashkëlidhen dokumenteve zyrtare që e vërtetojnë atë, përfshirë vërtetimin nga punëdhënësi për pozicionin dhe pagën e aplikantit e të personave të tjerë të familjes, që janë në marrëdhënie pune.
Dokument nga organet tatimore dhe ato të sigurimeve shoqërore për derdhjen e kontributeve nga Drejtoria Rajonale Tatimore, për të gjithë anëtarët madhorë të familjes të cilët janë në marrëdhënie pune ose të vetëpunësuar. Për ato aplikime në të cilat njëri prej anëtarëve madhorë është me raport (leje lindje), për të vërtetuar të ardhurat mbi të cilat kryhen përllogaritjet, do të merret në konsideratë periudha përpara barrëlindjes, duke respektuar afatin e depozitimit të dokumenteve. Përjashtimisht, aplikantët që punojnë në institucionin e Shërbimit Informativ Shtetëror, duhet të dorëzojnë vetëm vërtetimin nga punëdhënësi për pozicionin dhe pagën e tyre.
Vërtetim nga zyra e ndihmës dhe përkujdesjes pranë njësive të vetëqeverisjes vendore për anëtarët e familjes të përfshirë në programin e ndihmës ekonomike dhe të pagesës për personat me aftësi të kufizuar;
Vërtetim nga zyra e punësimit e njësisë vendore përkatëse për personat e përfshirë në programin e pagesës së papunësisë;
Vërtetim nga organet e sigurimeve shoqërore për personat në pension.
Vërtetim nga organet tatimore për të gjithë anëtarët madhorë të familjes, nëse figurojnë ose jo të regjistruar në sistemin informatik të Drejtorisë Rajonale Tatimore, Tiranë.
Ndër të tjera për të vërtetuar situata të caktuar është e nevojshme përpos listës së mësipërme të paraqiten edhe dokument si më poshtë vijon:
Vërtetimin nga zyra përmbarimore për masën e pensionit ushqimor që përfiton sipas vendimit të gjykatës. Përjashtimisht vërtetimi nga zyra përmbarimore për masën e pensionit ushqimor që përfitohet sipas vendimit të gjykatë nuk është i detyrueshëm, në rastet kur nuk ndikon në nivelin e të ardhurave minimale dhe maksimale të përfituesve potencialë.
Pasqyra financiare për vitin kalendarik të shkuar për personat e vetëpunësuar e njehsuar nga Drejtoria Rajonale Tatimore. Ekstrakt historik nga QKB.
Vërtetimi nga zyra e punësimit për personat të cilët janë regjistruar si persona punëkërkues të papunë.
Vërtetimi për individët në moshë madhore të cilët ndjekin studimet.
Vërtetim nga Drejtoria Rajonale Tatimore nëse kanë detyrime të papaguara, për personat e vetëpunësuar.
Vërtetim mbi bazën e vlerësuar:Vërtetim për pagesën e kontributeve të sigurimeve shoqërore (pas datës 01.01.2012).
Ndërkohë familjeve të cilat janë celebruar me shtetas të huaj ose individë të cilët kanë vendlindjen jashtë territorit të Republikës së Shqipërisë do t’u kërkohet vetëm dokumentacioni i siguruar nga Institucionet e Republikës së Shqipërisë.
