Ministrja e Shëndetësisë, Ogerta Manastirliu u shpreh se po bëhet një vlerësim i situatës me Covid-19 në vendin tonë dhe se masat kufizuese do të rishikohen në dy javët e para të muajit mars.
Ajo theksoi se incidenca ka ardhur në ulje. Shumë shtete europiane kanë hequr kufizimet anti-covid.
“Jemi duke vlerësuar me shumë kujdes situatën epidemiologjike, kemi indikatorë të përmirësuar, një incidencë e cila është në ulje, por sa i përket rasteve aktive vijojmë të kemi dhe duhet të tregojmë kujdes. Duke shpresuar që do të jemi në indikatorë të përmirësuar, do të rivlerësojmë masat në dy javët e para të muajit mars”, tha Manastirliu.
Kjo e fundit dha detaje edhe mbi sasinë e vaksinave që pritet të mbërrijë në vend. Deri tani janë kryer mbi 2 milion e 680 mijë vaksinime.
“Qeveria shqiptare ka miratuar kontratën për ardhjen e 1 milion dozave të vaksinave Pfizer, plus 500 mijë doza opsionale. Pra përgjatë gjithë këtij viti fjala kyçe do vijojë të mbetet vaksinimi dhe vaksinimi me dozën e tretë është sërish shumë i rëndësishëm në funksion të rritjes së imunitetit dhe shmangies të formave të rënda të sëmundjes”, tha Manastirliu.