“Truth Social”, aplikacioni i Donald Trump hapet për qindra testues

Rreth 500 testues kanë filluar të përdorin versionin fillestar të “Truth Social”, aplikacioni i ri i mediave sociale në pronësi të ish-Presidentit të SHBA-së, Donald Trump.

Testimi i “Truth Social” vjen një vit pasi Trump u ndalua të përdorte Facebook, Twitter dhe Alphabet në YouTube. Ndërmarrja e tij më e re në media dhe teknologji, Trump Media & Technology Group (TMTG), është zotuar të japë një “përvojë tërheqëse dhe pa censurë” në aplikacion, të cilin shefi ekzekutiv Devin Nunes thotë se do të hapet për publikun e gjerë në fund të marsit.

TMTG shikohet me skepticizëm nga kompanitë teknologjike dhe mediatike. Mbetet e paqartë nëse qëllimi i aplikacionit për lirinë e shprehjes mund të përshtatet me politikat e Apple dhe të Google App Store.

Deri më tani, disa nga përdoruesit që janë ftuar të përdorin“Truth Social” janë shprehur të kënaqur pasi aty kanë lirinë të shfaqin veten siç janë, gjë që nuk mund ta bëjnë në Twitter.

“Truth Social” i lejon përdoruesit të postojnë dhe të ndajnë “të vërtetat” në të njëjtën mënyrë që do ta bënin me një tweet. Nuk ka reklama, sipas Reuters.

Përdoruesit zgjedhin kë ndjekin dhe sinjalizohen nëse dikush i përmend ose fillon t’i ndjekë.