Çmimi i naftës në vend ka kapur vlera rekord, duke arritur deri në 200 lekë për litër.
Për këtë arsye, operatorët e transportit urban thonë se janë të detyruar të rrisin çmimin e biletës, nëse nuk marrin ndihmë nga Qeveria.
Ata kanë rikthyer sërish kërkesat që ja kanë drejtuar më parë qeverisë, të cilat konsistojnë në përjashtimin nga taksa e qarkullimit, si dhe ulja e pragut të TVSH.
“Një ndryshim i çmimit të naftës reflektohet te kostot e mirëmbajtjes së këtij sektori. Ne nuk kemi kërkuar diçka që s’mund të bëhet ose nuk na takon, ne po kërkojmë çmimin e naftës si sektor ta marrim sa vendet e rajonit. Kemi kërkuar të përjashtohemi nga taksa e qarkullimit, 27 lekë për litër është e padrejtë për ne. Duhet edhe mbështetje tjetër financiare, ulja e pragut të TVSH-së. Janë këto elemente, të cilat ne i kemi quajtur shtyllat ekonomike tonat që të kalojmë krizën dhe mos ketë ndikim në rritjen e çmimit të biletës për qytetarët. Në momentin që ne hasemi me një zë të shurdhër, nuk na përgjigjen, automatikisht do kërkojmë rritjen e çmimit të biletës”, deklaron Dashnor Memaj, kryetar i Shoqatës së Transportit Urban.
Operatorët e transportit urban i kanë ngritur këto kërkesa më herët ndaj qeverisë, me argumentin se pandemia dhe karantina i dëmtoi, por sipas tyre ata ende nuk kanë marrë zgjidhje.
