Dalëngadalë masat kufizuese për shkak të pandemisë, po hiqen në vendet evropiane. Italia do të nisë të lehtësojë masat më 31 mars, datë kur mbaron edhe gjendja e jashtëzakonshme. Prej 11 shkurtit, maskat do të jenë të detyrueshme vetëm në ambientet e brendshme. Nëse deri në atë ditë kurba epidemiologjike është shumë e ulët, detyrimi për të mbajtur maska, do të hiqet.
Ndërsa në stadiume kapaciteti do të jetë 100% prej prillit. Diskotekat gjithashtu po përgatiten të rihapen, ndërkohë që kurba e epidemisë vijon të bjerë. Por do të lejohen të hyjnë vetëm personat e vaksinuar.
Kufiri i kapacitetit të të gjitha klubeve nuk mund të kalojë 75% në ambiente të jashtme dhe 50% në ambiente të mbyllura.
Ministri i Shëndetësisë Roberto Speranza vijon të jetë i kujdesshëm me fjalët e tij, duke i ftuar qytetarët të vijojnë të respektojnë masat që janë në fuqi, por të dhënat në buletinin lejojnë planifikimin e lehtësimit të masave.
