Skema e pensioneve është e rrezikuar për shkak të largimit të të rinjve nga Shqipëria si dhe informaliteti ekonomik. Numri i pensionistëve është gjithmonë e në rritje, ndërsa ai i kontribuuesve është në rënie.
Kjo e ka detyruar qeverinë që të marrë para borxh nga buxheti i shtetit për të plotësuar fondin e nevojshëm për pensionet. Që kontribuuesit sot, të sigurojnë pensionin propozohet ndryshimi i skemës së pensioneve.
“Nëse ne do të përdorim një mekanizëm të tretë: është pensioni privat. Po çfarë i mundëson kjo një pensionisti? Ai krahas pensionit shtetëror merr dhe një tjetër që është ai privat. Gjithashtu ky pension edhe trashëgohet nëse kontribuues nuk mundet ta marrë sepse ndërron jetë para kohe.
Ndërkohë që në rastin e pensionit shtetëror të gjitha kontributet që derdhim ne sot në skemën e sigurimeve shoqërore kthehen ose jepen si një e ardhur për pensionistët, por ato nuk gjenerojnë të ardhura”, tha ekspertja e ekonomisë, Teuta Nunaj Kortoçi për “Top channel”.
Numri i kontribuues është në rënie, vetëm për vitin 2020 kemi 35 mijë kontribuues më pak.
“Nëse në vitet 90’ kishim 1 pensionist dhe 5 kontribuues. Sot kemi 1.-1.5 kontribuues. Kjo ulje kaq e madhe e kontribuuesve ul edhe sasinë. Dhe kur këto të ardhura janë minimale 30-40 mijë lekë të reja, atëherë përqindja që paguhet si nga punëdhënësi dhe punëmarrësi është në minimum.
Ndërkohë që pensionet tona janë 12-14 mijë lekë, që do të thotë se sasia që merr një pensionit është dyfishi ose më e madhe se sa kontributi minimal që paguan një punonjës. Për këtë arsye kjo skemë nuk mbulohet”, shtoi ekspertja.
