Roberta Metsola u shpall presidentja e re e Parlamentit Evropian dhe do të zëvëndësojë David Sassolin i cili ndërroi jetë javën e kaluar. Metsola ishte në garë me Sira Rego, Kosma Zlotowski dhe Alice Bah Kuhnke, por arriti të fitonte me 458 vota pro nga 705 gjithsej. Me zgjedhjen e saj si presidente do të jetë hera e tretë që një grua do të ulet në postin e kreut të PE-së.
Por, kush është presidentja e re e Parlamentit Evropian?
Metsola është nënë e 4- fëmijëve, 43 vjeç me origjinë nga Malta, është personi më i ri që vendoset në krye të këtij posti. Më herët Metsola ka mbajtur postin e zv/presidentes dhe u emërua në ditën e saj të lindjes. Ajo gjithashtu është anëtare e Partisë Popullore Evropiane, që është grupi më i madh politik i parlamentit.
Presidentja e re është në linjën e qëndrës së djathtë dhe konservatore, ndërsa para se të bëhej deputete në vitin 2013, ushtronte profesionin e avokates. Metsola është specializuar veçanërisht për të drejtën evropiane dhe është vlerësuar për rolin e saj në zgjidhjen e mosmarrëveshjeve politike, por kritikohet për qëndrimin e saj kundër abortit.
Në një fjalim që Metsola mbajti për deputetët pas zgjedhjes, tha se është krenare për përgjegjësinë që i është dhënë asaj.
“Premtoj se do të punoj dhe do të bëj më të mundurën time për interesat e këtij Parlamenti dhe të gjithë qytetarëve të BE-së”, u shpreh ajo.
