I ftohti ndikon në mënyrë të pashmangshme në trupin tonë dhe rrezikojmë të prekemi nga sëmundjet sezonale, por jo vetëm. Ftohjet, dhimbjet e fytit dhe ethet shpesh na shoqërojnë në këtë periudhë, por ka shumë ndryshime të tjera jo të mira që mund t’i vërejmë në trupin tonë gjatë muajve të ftohtë.
Këtu janë 5 mënyrat se si temperaturat e ulëta na ndikojnë, dhe cilat janë strategjitë për të mbrojtur veten.
Rrjedhja e hundës
Ndonëse është e bezdisshme, të kesh rrufë nuk është aspak shqetësim. Pasi ajo nuk nënkupton që një ftohje e fuqishme po zhvillohet, do të thotë vetëm se trupi juaj po mbrohet nga i ftohti i dimrit.
Duke qenë se hunda është pjesa e parë e sistemit të frymëmarrjes, ajo ka një funksion shumë të rëndësishëm: të ngrohë dhe të filtrojë ajrin që thithim përpara se të arrijë në mushkëri.
Meqenëse ajri është shpesh i ftohtë dhe i thatë në dimër, hunda rrit prodhimin e mukusit për të rikrijuar kushtet ideale, më të ngrohta dhe të lagështa, për të punuar.
Megjithatë, është e rëndësishme të shmangni ndryshimet e papritura të temperaturës dhe të përdorni një lagështues në shtëpi për të ruajtur nivelin e duhur të lagështisë.
Faqe që bëhen të kuqe
Një nga efektet më të dukshme të temperaturave të ulëta në trup është skuqja e faqeve. Është një djegie e vërtetë e shkaktuar nga era e ftohtë, siç ndodh në verë për ekspozimin ndaj dritës së diellit. Nuk ka asgjë për t’u shqetësuar, në fakt është një efekt kalimtar dhe nuk shkakton asnjë problem për trupin.
Ky fenomen ndodh sepse i ftohti dhe lagështia e ulët bëjnë që lëkura të humbasë vajrat e saj natyrale. Ndër pasojat kryesore, përveç skuqjes, mund të ndjeni kruajtje dhe ndonjëherë edhe pak ënjtje.
Mënyra më e mirë për të parandaluar këtë problem është të mbuloni zonat e ekspozuara duke përdorur syzet e diellit, një shall dhe doreza.
Lëkurë të thatë
Jo vetëm faqet janë në rrezik prej skuqjes. Në përgjithësi, i ftohti dhe thatësia e ajrit shkakton efekte negative në lëkurën e të gjithë trupit, edhe në zonat ku nuk ka ekspozim të drejtpërdrejtë. Shkaku i lëkurës së thatë është lagështia e ulët e mjedisit, e cila nxit dehidratimin e lëkurës. Kësaj i shtohen edhe efektet e vazokonstriksionit, me të ftohtin, trupi tenton të kontraktojë enët e gjakut në mënyrë që të mos shpërndajë nxehtësinë.
E gjithë kjo shkakton skuqje, kruajtje, plasaritje, si dhe rrit rrezikun e dermatitit dhe eritemës.
Për të luftuar këtë problem të bezdisshëm, duhet të shmangni produktet higjienike agresive dhe të përdorni rregullisht hidratues.
Kollitjes dhe vështirësia në frymëmarrje
Një tjetër nga efektet më të zakonshme të temperaturave të ulëta në trup është shfaqja e papritur e simptomave si kolla e thatë. Zakonisht shkaktohen nga ajri i ftohtë, i cili irriton rrugët e frymëmarrjes dhe mushkëritë. Është një problem që prek shpesh personat me astmë ose bronkit, por është i shpeshtë edhe te njerëzit e shëndetshëm.
Hunda përpiqet të mbrojë trupin nga ajri i ftohtë dhe i thatë duke rritur prodhimin e mukusit, megjithatë, nëse jeni mësuar të merrni frymë përmes gojës trakti i frymëmarrjes ka më shumë gjasa të vuajë pasojat e rrjedhës së ajrit të lagështuar jo në mënyrën e duhur. Thatësia ngushton rrugët e frymëmarrjes dhe e bën më të vështirë frymëmarrjen, plus mund të shkaktojë vështirësi në frymëmarrje ose një kollë të vogël.
Si mund të mbroheni nga këto simptoma? Para së gjithash, përpiquni të merrni frymë përmes hundës, e cila ka sistemin e vet efektiv për ta bërë ajrin të arrijë në mushkëri në kushte ideale. Gjithashtu mbuloni hundën dhe gojën me shall kur jeni jashtë sepse ndihmon për të krijuar një ambient më të ngrohtë dhe më të lagësht në hyrje të rrugëve të frymëmarrjes.
Dridhjet e të ftohtit
Kur ndjen të ftohtë, fillon të dridhesh. Është një ndjenjë që të gjithë e njohim shumë mirë, por cila është arsyeja pse ndodh kjo? Ky është një tjetër mekanizëm mbrojtës që trupi vendos për t’u mbrojtur nga temperaturat e ulëta. Të dridhurat nuk janë gjë tjetër veçse kontraktime të shpejta të muskujve me të cilat trupi gjeneron nxehtësi.
Qëllimi është të parandalohet që temperatura e trupit të bjerë shumë e ulët, duke krijuar fenomenin e quajtur hipotermi, i cili është i rrezikshëm.
Ilaçet për të luftuar të ftohtin konsistojnë në veshjen e duhur, sipas rastit: nëse në shtëpi, ndërkohë që jemi pak në lëvizje mjafton një pulovër e hollë, kur ulemi në divan mund të na nevojitet një më e ngrohtë dhe në ambientet e jashtme një xhup apo pallto e trashë, shall, kapele dhe doreza.
