Lëkundjet e tërmetit me epiqendër në Folorinë të Greqisë, janë ndjerë edhe në vendin tonë. Sizmologu i njohur, Shyqyri Aliaj, ka folur mbi tërmetet e herëpashershme që po regjistrohen në rajon, dhe se sa e rrezikuar është Shqipëria.
“Ndërtesat e larta e ndjejnë më shumë lëkundjen. Katete e sipërme më shumë. Por nuk duhet të shqetësohemi për një tërmet që bie në Folorinë të Greqisë. Duhet kuptuar që është periudha e çlirimit të energjisë. Pas tërmetit të prillit të ’97 nuk ka pasur më tërmete, derisa ndodhi ai i 26 nëntorit. Ka pasur lëkundje të lehta, por jo në përmasa shumë të mëdha që të bëjnë dëme. Kjo ka qenë një periudhë e akumulimit të energjisë sizmike.
Ndërsa tani në këtë periudhë çlirohet energjia. Tërmete të tilla ndodhin në zonën lindore dhe lëkundjet nuk bëjnë shumë dëme. Tërmetet më të rrezikshme janë në pjesën ballore të vendit, aty ku takohen dy kontinentet, ai evropian dhe afrikan. Tërmeti në Greqi nuk ka pse të na shqetësojë ne në Shqipëri. Tërmetet të tilla do të ketë edhe në Shqipëri në pjesën lindore të vendit, por nuk ka asgjë për t’u shqetësuar. Kjo periudhë 10-15 vjet, do të ketë tërmetet ë tilla, por se sa do të ketë nuk mund ta themi. Megjithatë nuk janë tërmetet për të cilat duhet të shqetësohemi”, tha Aliaj.
