Në Shqipëri po qarkullojnë të dy shtamet e Covid-19, Delta dhe Omicron.
“Mbizotëron qarkullimi i Covid. Dhe aktualisht janë të dy shtamet, Delta dhe Omicron i cili do bëhet mbizotërues shumë shpejt. I rëndësishëm është vaksinimi për të qenë sa më të mbrojtur”, thotë epidemiologu Artan Simaku.
Nga ana tjetër, krahas Covid, në vend ka qarkullim të dendur të gripit dhe virozave. Specialistët e ISHP thonë se vetëm kryerja e testit antiCovid mund të bëjë diferencën nëse një qytetar ka Covid, grip apo virozë.
“Kemi Covid dhe grip qarkullim të hapur dhe të shtrirë në të gjithë vendin. Klinikisht është i vështirë të dallohet gripi nga Covid, edhe pse gripi ka temperaturë më të lartë. Gjëja e parë që duhet të bëjnë qytetarët është kontakti me mjekun e familjes. Dhe testimi sipas procedurave dhe protokolleve nga mjeku i familjes”, thonë mjekët.
Specialistët e ISHP thonë se rastet e rritura i atribuohen qarkullimit të Omicron.
“Momentalisht situata në spitale paraqitet e qëndrueshme, por në ditët në vijim pritet rritje e rasteve”, shprehen ata.
Sipas mjekëve në një kohë kur në vend qarkullon gripi dhe Covid, i rëndësishëm është vaksinimi i popullatës mbi 16 vjeç.
