Larja e enëve mund të jetë një nga punët që na pëlqen më pak për të bërë në shtëpi sepse më pas na duhet të lajmë edhe lavamanin. Por “Shije Shtëpie” në Tv Klan ju vjen në ndihmë të gjitha amvisave për ta bërë sa më të lehtë larjen e tij dhe mbi të gjitha eliminimin e papastërtive, pikave të ujit apo çdo njolle tjetër.
Iva Dokle ka si gjithnjë zgjidhjen e duhur për të pastruar jo vetëm sipërfaqen, por edhe tubat, me vetëm pak përbërës dhe tre mënyra si t’i përdorni.
Përbërësit:
Limon
Sodë buke
Kripë
Detergjent enësh
Mënyra 1:
Përziejmë pak detergjent enësh dhe sodë buke derisa të formohet një pastë. Pastën e shpërndajmë mbi sipërfaqen e lavamanit dhe e lëmë të veprojë për disa minuta. Më pas, lajeni si zakonisht me një sfungjer me ujë.
Mënyra 2:
Merrni një gotë lëng limoni dhe një gotë sodë, në sasi të barabarta. Hidhni fillimisht sodën e bukës brenda tubit të lavamanit. Shtoni lëngun e limonit dhe mbulojeni me një pecetë. Pasi ta keni lënë disa minuta, mjafton të hidhni ujë të nxehtë.
Mënyra 3:
Limonat që shtrydhët për të përftuar lëngun lyejini me kripë dhe fërkoni lavamanin me to që të shkëlqejë si i ri.
