Lidhja Social Demokrate ka pranuar dorëheqjen e liderit të saj Zoran Zaev.
Pas mbledhjes Këshillit Ekzekutiv dhe Kryesisë Qendrore, LSDM ka shpallur zgjedhjet e brendshme partiake për kryetarin e ri, më 12 dhjetor.
Sipas zëdhënëses së partisë Bogdanka Kuzevska, procedura për zgjedhje fillon menjëherë dhe në këto zgjedhje kanë të drejtë të kandidohen të gjithë anëtarët e partisë të cilët i plotësojnë kushtet sipas statutit.
“Zgjedhjet do të mbahen me 12 dhjetor, dita e diel. Procesi për kandidim do të zgjas 7 ditë. Ndërsa të drejtë për kandidaturë kanë të gjithë anëtarët e LSDM-së që i plotësojnë kriteret sipas statutit të partisë. Të drejtë për të votuar do të kenë të gjithë anëtarët e LSMD-së ql në mënyrë aktive do të regjistrohen përmes online aplikacionit.”, tha Bogdanka Kuzevska, zëdhënëse e LSDM-së.
Zaev ka paraqitur dorëheqje edhe nga drejtimi i ekzekutivit, por ajo ende nuk është miratuar në Kuvend.
Pas dorëheqjes së Zaev, Maqedonia e Veriut hyri në krizë politike. Opozita maqedonase dorëzoi iniciativë për votim të mosbesimit të Qeverisë, ndërsa në listën e kësaj iniciative ishin nënshkruar edhe deputetët e koalicionit Aleanca për Shqiptarët dhe Alternativa, Lëvizjes Besa dhe “Të majtës”, çka ishin siguruar 61 deputetë për rrëzim të Qeverisë.
Megjithatë, deputeti i Lëvizjes Besa, Kastriot Rexhepi nuk u paraqit në seancën ku duhej të diskutohej dhe të votohej për mosbesimin e Qeverisë, çka opozita nuk arriti të sigurojë kuorum as për të filluar seancën dhe bdaj mocioni dështoi.
