Federata Shqiptare e Futbollit reagoi pas incidenteve që ndërprenë për 20 minuta takimin mes Shqipërisë dhe Polonisë që po shqyrtohen nga FIFA për masat që do të merren.
FSHF thotë se këto probleme të rënda duhen zgjidhur sa më parë, pasi janë shfaqje që nuk na nderojnë aspak. Por në deklarate thuhet se këto reagime ishin edhe si pasojë e një provokimi të vazhdueshëm dhe një sjelljeje shumë agresive nga ana e tifozëve polak që kanë goditur për gati 2 orë tifozët shqiptarë.
Në reagim gjithashtu përmendet se këtë sezon në stadiumin “Air Albania” do të luhet finalja e Conference League. Në mënyrë që ky aktivitet të organizohet në mënyrë sa më perfekte, pritet që në vendin tonë të mbërrijnë ekspertë të UEFA-s të cilët do të ndjekin disa ndeshje të Abissnet Superiores dhe kryesisht Derbit, ku ka prani më të madhe tifozësh. Kjo për të strukturuar në mënyrë sa më të mirë organizimin për të tilla takime.
