Oreksi vjen duke ngrënë dhe po ashtu edhe ambicia për të fituar dhe për të shkuar sa me lart në arenën e Botërorit të Katarit. Shqipëria që e nisi thuajse pa pretendime fushatën kualifikuese tashmë ka shpresa për t’u kualifikuar në play off si vendi i dytë në grup. Për t’ia arritur kësaj i duhet të fitojë me Poloninë si rivali direkt për këtë pozicion.
“Ka vetëm një gjë që mund të bëjë të humbësh ëndrrën, frika për të mos ia dalë. Nuk duhet të kemi frikë. Lojtarët duhet të jenë të bindur që mund t’ia arrijmë. Edhe fati ka pjesën e vet. Duhet të kemi iniciativën tonë për të kontrolluar lojën. Pa një gjë të tillë nuk mund të bësh rezultat. E rëndësishme që skuadra të mos qëndrojë në mbrojtje, por të sulmojë dhe të bëjë lojën e vet” , tha ai.
Edhe Polonia ka ardhur për të fituar dhe për të arritur vendin e dytë. Në Air Albania pritet një ndeshje nervash dhe dinakërie.
“Ata i kanë lojtarët për të na sulmuar. Mendoj se do të tentojnë të na godasin që në fillim dhe të mbyllin këtë çështje. Ne kemi krijuar ADN tonë, jemi një skuadër e vërtetë. Nesër nuk duhet të gabojmë në asgjë. Në çdo situatë duhet të kemi përqendrimin maksimal. Por nuk ka përfunduar asgjë. Kemi edhe dy ndeshje të tjera”, tha ai.
Kapiteni Etrit Berisha shpreson tek mbështetja e tifozëve të Air Albania që sikurse është konfirmuar do të jetë në kapacitet të plotë, rreth 22 mijë tifozë të pranishëm.
“Kemi bërë gjera të mira, por nuk domethënë që jemi të kënaqur. Ndeshja nesër ka domethënie shumë të madhe për të gjithë shpresoj ta interpretojmë në mënyrën më të mirë të mundshme. Presioni më i madh është tek Polonia se sa tek ne. Kemi edhe tifozët mbështetje”, tha ai.
Disa prej futbollistëve të kombëtares kanë shqetësime të lehta muskulore pas ndeshjes me Hungarinë. Për këtë arsye trajneri ende nuk është i vendosur mbi formacionin titullar.
