Të gjithë personat nën 18 vjeç nuk do të lejohen të marrin injeksione të botulinum-që shpesh njihet si Botox ose filler të buzës në Angli. Ligji i ri është miratuar si një synim për të mbrojtur të rinjtë nga incidentet dhe dëmtimet, ndërkohë që ka patur vite përpjekje për të rregulluar industrinë e bukurisë jo-kirurgjikale.
Megjithatë, aktivistët thonë se ligji i ri nuk përfshin të tjera çështje problematike që janë kthyer në trend bukurie, të tilla si vendosja e fijeve në lëkurë për të patur sytë e ashtuquajtur ‘sytë si të dhelprës’.
Vlerësimet e qeverisë tregojnë se deri në 41,000 procedura Botox u kryen në moshat nën 18 vjeç në Angli vitin e kaluar. Dhe analiza nga Departamenti i Shëndetit dhe Kujdesit Social tregoi se ka pasur deri në 29,300 procedura filler për kategorinë nën 18 vjeç në vitin 2017.
Mediat britanike kanë publikuar rastin e një 34 vjeçareje me emrin Laura Brooks e cila vendosi të bënte buzët me filler në dhjetor të 2020-ës. Por procedura shkoi keq dhe pavarësisht se kanë kaluar gati një vit, ajo ende ka shenjë në buzë. Laura ka treguar se kishte gjetur një qendër estetike ku injeksionet ishin me çmim më të ulët. Por pasi kreu procedurën, kuptoi se diçka nuk po shkonte mirë. Ajo shkoi tek një mjek i cili i sugjeroi të hiqte fillerin që kishte vendosur në buzë, gjithashtu i dha disa ilaçe dhe akull për ta mbajtur që t’i ulej enjtja. Ajo thotë se mbështet nismën e qeverisë, por kërkon që të përfshihen edhe trajtime të tjera, dhe të vendosen rregulla për ata që e ofrojnë këtë shërbim: Duhet të jenë të specializuar.
Deputetja Laura Trott, e cila ishte ndër të parat që kërkoi ndryshimin e legjislacionit në Parlament, tha:
“Asnjë i ri nuk ka nevojë për Botox kozmetik ose mbushës-filler dhe nga sot ata nuk do të jenë më në gjendje të hyjnë në një klinikë ose në shtëpinë e dikujt dhe të bëjnë një procedurë të rrezikshme dhe të panevojshme që mund të shkatërrojë jetën e tyre. Jam e vetëdijshme se nuk do e rregullojë tërësinë e problemeve në këtë industri, por do të sjellë një ndryshim të vërtetë për moshat nën 18 vjeç”, tha ajo.
