Situata me pandeminë në vend është drejt rënies. Mjeku epidemiolog Ilir Alimehmeti analizon treguesit e pandemisë që sipas tij dëshmojnë se vala e 4 ka nisur rënien dhe se në ditët në vijim shifrat do vazhdojnë të bien.
“Situata është në rënie. Ka filluar rënia në gjysmën e shtatorit. Kjo është ndjekur me dy javë distancë me shtrimet spitalore dhe humbjet e jetës. Situata është në rënie, por numrat janë të rëndësishme. Ka ende 180 të shtruar në spital. Ato humbjet e jetës gjatë javës së kaluar janë ndaluar, megjithatë ka humbje jete. Situata është në rënie, por jemi akoma pak lart”, tha mjeku për News24.
Mjeku Alimehmeti apelon kryerjen e vaksinimit tek gratë shtatzëna pas muajit të tretë, ndërsa thotë se kush e ka kaluar sëmundjen, gëzon imunitet.
“Fillojmë me ata që planifikojnë shtatzëninë. Për arsye sigurie më shumë edhe pse nuk na gjen gjë, mund ta shtyjnë planifikimin e shtatzënisë me 5-6 muaj. Nëse vaksinohen sot mund ta planifikojnë në mars-prill. Tre muajt e parë të shtatzënisë është faza embriologjike. Këtu është ai ngurrimi. Këto 3 muaj nuk duhet përdorur. Një studim të mirëfilltë nuk ka. Është kjo ndjenja e mbrojtjes së tepërt. Ndërsa për muajt nga i katërti tek i nënti, nuk kemi parë shqetësime për shëndetin e nenës. Sa i takon shëndetit të fëmijëve nuk ka një studim, por flamuj të kuq nuk është se kanë dalë. Si rrjedhojë mjeku që ndjek gruan duhet të japë këshilla, por flamuj të kuq nuk ka për muajt nga i katërti tek i nënti”, u shpreh mjeku.
