Mjeku reanimator Alban Beltoja, ka analizuar situatën e infektimeve me Covid-19 në Shqipëri. Sipas tij jemi në një valë të re të infektimeve dhe shifrat duhen marrë parasysh, për të përballuar situatën.
“Për situatën në Shqipëri mund të them se numri i rasteve të shtruar që marrin trajtim në spitalet kovid, janë persona që nuk janë të vaksinuar. Në Itali ku unë punoj mbetet më i vështirë vaksinimi i të rinjve. Ndërsa grupmosha e fëmijëve të shkollës ka kohë që i është nënshtruar vaksinimit. Ata duhet të jenë të pajisur me “lejen e gjelbër”, si detyrim dhe stimul që kjo kategori e popullsisë të vaksinohet. Në qendrat e vaksinimit fëmijët janë shoqëruar nga prindërit dhe dozat nuk japin efekte anësore. Madje është përjashtuar mundësia edhe për Miokardin, një inflamacion që ndodh kryesisht te fëmijët mbi 12-vjeç kur marrin dozën e dytë të vaksinës. Vaksinimi i kësaj grupmoshe i përjashton ata si transmetues të virusit. Sepse sa më shumë që të qarkulloj virusi pa kontroll aq më tepër i rrezikshëm bëhet për shoqërinë. Ndërsa në Itali ka nisur edhe aplikimi i një doze të tretë, për të gjithë ata persona që kanë sëmundje shoqëruese.
Në Shqipëri ka një valë tjetër të kovidit, ndoshta jo si ajo që ka kaluar, por sërish shifrat nuk duhen shmangur. Ajo që ka treguar pandemia e kovidit është se nuk ka asgjë të parashikueshme. Të arrihet imuniteti i tufës duket shumë e vështirë. Ndërsa në Shqipëri duhet të vijoj vaksinimi masiv, për të pasur një vjeshtë të lehtë”, u shpreh Beltoja në Dritare TV.
