Sistemi shëndetësor grek rrezikohet të zhytet në kolaps. Nga kjo e Mërkurë hyn në fuqi rregulli për pezullimin e mjekëve dhe pjesëtarëve të tjerë të stafit mjekësor publik, që nuk janë vaksinuar.
Nga puna rrezikojnë pezullimin rreth 10 mijë punonjës të këtij shërbimi, sa ç’është përllogaritur të jetë numri i tyre që nuk kanë pranuar të vaksinohen. Qeveria Micotaqis duket e vendosur në zbatimin e këtij vendimi.
Zyrtarët e ministrisë së shëndetësisë thonë se kanë gati planin për zëvendësimin e mjekëve që nuk duan të imunizohen ndaj COVID-19ës me kolegë të tyre që punojnë në sektorin privat. Sindikatat e mjekëve dhe punonjësve të shëndetësisë kanë paralajmëruar nisjen e një vale të re protestash masive kundër këtij vendimi.
Me të njëjtat masa kufizuese pritet të përballen rreth mesit të këtij muaji edhe mjekët në vende të tjera europiane si Itali dhe Francë.
Sakaq, nga kjo e Mërkurë edhe në Itali, certifikata e gjelbër, që vërteton imunizimin ose negativizimin ndaj COVID-19ës është e nevojshme edhe në mjetet e transportit publik për distanca të gjata, si autobusë, trena, tragete e avionë.
