Varianti “Delta” po prek edhe të vaksinuarit. Komiteti Teknik i Ekspertëve është mbledhur dje për të dhënë vendimet e marra në lidhje me variantin “Delta”. Përmes një konference për mediat, zëvendësministrja e Shëndetësisë, Mira Rakacolli, bëri me dije se varianti i ri ka filluar të përhapet me ritme të shpejta në vendin tonë.
Rakacolli tregoi se në javën e fundit është vënë re një rritje e lehtë e infeksioneve, por gjithsesi situata në tërësi paraqitet e qetë dhe nën kontroll. Në këtë kuadër ajo tha se, Komiteti ka vendosur që të paktën edhe për dy javët e ardhshme masat kufizuese të mbeten këto që janë.
“Në vend ka një rritje të lehë të numrave të rasteve të reja ditore dhe incidencës një javore. Por pavarësisht kësaj, vendi vazhdon të mbetet në një situatë të qëndrueshme epidemiologjike. Në Rajon, Europë dhe botë vihet re një rritje e konsiderueshme e rasteve të reja. Siç është bërë me dije, në Shqipëri është vërtetuar zyrtarisht dyshimi për praninë e variantit “Delta” të virusit. Pavarësisht se është vërtetuar dyshimi i fortë për prezencën e variantit Delta, niveli i masave nuk ndryshon. Masat do të jenë po ato të cilat kanë qenë më parë”, tha Rakacolli.
Fakti më shqetësues në këtë mes është se ministria bën vazhdimisht thirrje për t’u vaksinuar, por burimet tregojnë që ky varianti i ri ka prekur ata persona që kishin marrë të dyja dozat e vaksinave. Në konferencën e djeshme Shefja e Departamentit të sëmundjeve Infektive, Silva Bino, tha se nga 9 raste të shtruar në spital me “Delta” 6 prej tyre ishin të vaksinuar me “AstraZeneca”, “Pfizer” dhe “Coronavac”.
“Janë 6 raste të vaksinuar, 2 raste kanë lidhje me udhëtimin në Angli. Kanë qenë të vaksinuar në “AstraZeneca” në prill. Dy të tjerë kanë qenë të vaksinuar në Gjermani me “Pfizer” vetëm me një dozë, dhe 2 të tjerët kanë qenë me Coronavac”, tha Bino.
Ja çfarë do të bëhet me shkollat
Ndërkohë e pyetur në lidhje me vitin e ri shkollor, zëvendësministrja Rakacolli tha se, në kushtet që jemi plani është që shkollat të fillojnë mësim normalisht. Sipas saj, këtë vit nuk ka pse të bëhet mësimi online pasi pjesa më e madhe e mësuesve janë vaksinuar.
“Të gjitha vendimet ne i marrim me situata konkrete epidemiologjike, nëse do vijojmë me të njëjtën situatë, nuk ka asnjë arsye që shkollat mos fillojnë normalisht sikurse do të fillojë, aq më tepër që arsimtarët janë vaksinuar, shumica e fëmijëve kanë personat me të cilët jetojnë të vaksinuar. Por do të shikojmë se si do të jetë situata epidemiologjie dhe në varësi të saj do të jetë vendimi për shkollat”, u shpreh Rakacolli.
Këtu ajo shtoi se, Komiteti nuk ka menduar në asnjë moment që të zbatojë vaksinimin me detyrim për të rinjtë. Sipas saj, bërja e vaksinës duhet të arrihet me sensibilizim tek qytetarët për të mirën e të gjithëve ne.
“Sensibilizimi i qytetarëve nuk është punë vetëm e Ministrisë, por e gjithë shoqërisë. Të rinjtë e kanë kulturën e vaksinimit dhe jam i bindur që nuk do shtrohet për të rinjtë vaksinimi i detyruar se jam i bindur se do e bëjnë sepse duhet ta bëjmë”, tha Rakacolli.
