Varianti Indian i koronavirusit mund të ketë mbërritur edhe në Shqipëri. Instituti i Shëndetit Publik ka hedhur dyshime mbi disa mostra, për të cilat ministrja e Shëndetësisë, Ogerta Manastriliu tha se po analizohen në laboratorët e referencës. “Në Institutin e Shëndetit Publik janë duke u bërë analizat dhe është vlerësuar që një seri mostrash, të cilat janë identifikuar si sinjale të pazakonta, të çohen në Laboratorin e Referencës në Gjermani, për të bërë vlerësimet e mëtejshme dhe për t’u bërë sekuencimi genomik, në mënyrë që të shihet nëse ka një qarkullim të mundshëm të variantit Delta në Shqipëri”.
Nga qendra e vaksinimit ne Sauk, Manastirliu bëri apel që të mos neglizhohet vaksinimi anti-Covid.
“Jam këtu për të nxitur edhe njëherë vaksinimin, në qendrat shëndetësore, në ambulanca, në qendrat e vaksinimit të përqendruar. Tashmë, duke filluar nga fundjava dhe në vijim, edhe me njësitë lëvizëse, të cilat do të jenë në territor dhe do të ndihmojnë për vaksinimin në zonat ku kemi xhepa ende të pavaksinuar”.
Grupmosha më mirë e mbuluar sa i takon vaksinimit është ajo 70-79 vjeç. plani kombëtar i vaksinimit parashikon vijimin e vaksinimit të kombinuar por edhe ditët e hapura të vaksinimit +18 vjeç, të cilat do të rikthehen sërish në muajt Korrik dhe Gusht. Prej fillimit të vaksinimit janë kryer në total mbi 1milion doza të vaksinave anti-COVID. Prej tyre rreth 430 mijë qytetarë i kanë marrë të dyja dozat e vaksinës.
