Zv.ministrja e Shëndetësisë, Mira Rakacolli ka deklaruar se vaksinat kundër Covid-19 mund të parandalojnë variantin Delta, i cili është edhe më shumë infektues, ndonëse në vendin tonë nuk është regjistruar asnjë rast.
“Varianti Delta është e mundur që të identifikohet nga ISHP, por përderisa është fillimi na duhet të jemi të sigurt dhe na duhet edhe nga laboratorët jashtë, deri tani nuk kemi të dyshuar për variantin Delta. Ndryshimi me variantet e tjera, është fakti se ky variant është me infektues. Lajm i mirë është që vaksinat mund ta parandalojnë. Njerëzit duhet të vazhdojnë që të kenë në vëmendje vaksinimin, pasi është e vetmja mënyrë për të ndaluar përhapjen e virusit”, u shpreh Rakacolli.
Ndër të tjera, Rakacolli theksoi sërish duke folur për “Report Tv” se orari i muzikës nuk do të shtyhet, për shkak se jemi në një moment alerti për variantin Delta, i cili është përhapur mjaft në Europë dhe Angli.
“Ne jemi në alert për Deltën dhe nuk mund të mendojmë për një shtim të orarit të muzikës për momentin. Nëse situata do të jetë e qëndrueshme çdo gjë mund të rivlerësohet. Masat ne nuk i kemi marrë kot”, tha Zv.ministrja Rakacolli.