Punimet në By Pass-in e Vlorës vazhdojnë, ndërsa hapja e njërës korsi për të mundësuar kalimin e automjeteve në këtë rrugë gjatë verës do të jetë më datën 15 Korrik.
Fillimisht ishte parashikuar që segmenti të ishte i kalueshëm në nisje të sezonit turistik, por problematikat siç thonë zyrtarë të Ministrisë së Infrastrukturës nuk kanë qenë të pakta, madje projekti nuk ishte studiuar si duhet.
“Ishte projekt i pa studiuar mirë, daton në 2009 dhe nuk e ka prekur fare gjeologjinë.”
“Ka qenë një zonë në Kaninë në kilometrin e 20 ku shtresat e argjilit ishin brenda atyre gëlqerore dhe ka krijuar problematikë.”
Njëra nga urat ka përfunduar dhe është dorëzuar, ndërsa janë drejt fundit dhe dy të tjera, ndërsa është zgjidhur problematika me urën 4, e cila ndodhet në një zonë me rrëshqitje të shumta.
Në një pjesë të mirë të By Pass-it është hedhur asfalti.
“Këtu po hidhet asfalti dhe shohim mjetet që janë intensivisht në punë dhe po vendosin gardielat.”
By Pass-i Vlorës pritet që të shkurtojë ndjeshëm udhëtimin në jug të vendit, duke anashkaluar hyrjen e mjeteve brenda në qytetin e Vlorës për të kaluar në segmentin Dukat-Orikum. Rruga është 29 kilometra e gjatë dhe ndërtimi i saj kushtoi 35.8 milionë Euro.
Ndërtimi i aksit nisi në 2012-n, por problemet që pati kompania Serenissima e cila u kontraktua fillimisht për ndërtimin e tij, bënë që autoritetet të tenderonin dhe njëherë projektin për të rinisur punimet në fund të vitit 2018.
