Prej më shumë se një viti, tashmë, pandemia e COVID-19 ka kufizuar lëvizjet e qytetarëve shqiptarë brenda e jashtë vendit, e sidomos kur bie fjala tek turizmi. Por ashtu si çdo e keqe e ka një të mirë, dhe anasjelltas, edhe ky “izolim” bëri që të gjithë të pasionuarit pas natyrës të kthejnë sytë nga destinacionet turistike brenda vendit. Dhe Divjaka, Parku Kombëtar i Karavastasë përgjatë kësaj periudhe është kthyer në një nga destinacionet më të preferuara të qytetarëve, duke ofruar ajër të pastër dhe natyrë të qetë.
Kjo për faktin, se parku ka një shtrirje gjeografike të konsiderueshme, dhe mundësitë për të shijuar natyrën, gjelbërimin, dhe gjithë resurset që ofron zona, të jenë të mëdha për adhuruesit e këtij lloj turizmi.
Një përshtypje të tillë e krijova edhe vetë fundjavën e kaluar, ku së bashku me miqtë zgjodhëm Parkun e Karavastasë për të kaluar kohën e lirë, dhe mbresat ishin të veçanta.
Kjo pasi, plazhi, laguna dhe pylli që e rrethon janë tre asetet kryesore të zhvillimit të turizmit në Divjakë, krahas monumenteve të kulturës që ndodhen në zonë.
Me një kullë panoramike, varka për të shëtitur vijë ujore përgjatë gjithë parkut, pyllin e gjelbëruar dhe me larmishmëri shpendësh, janë disa nga aventurat që nuk duhen humbur kur viziton këtë park të rijetësuar.
Të udhëtosh drejt Divjakës
Rruga që të çon në Parkun Kombëtar Divjakë – Karavasta është tërësisht e rehabilituar dhe kjo të jep mundësinë që të shkosh më shpejt në këtë destinacion të veçantë të turizmit, por edhe të biodiversitetit.
Vëmendje të veçantë gjatë rrugëtimit morën padyshim fermerët e palodhur, të cilët kishin “qëndisur” tokat bujqësore në të dyja anët e rrugës, me të mbjellat e tyre. Kushtet e favorshme të klimës në këtë zonë, u japin atyre mundësinë që prodhimet e tyre të jenë sa më cilësore.
Një tjetër gjë që na bëri përshtypje, ka të bëjë edhe me vizitorët nga Kosova, të cilët ashtu si ne, kishin zgjedhur Divjakën për fundjavën e tyre, dhe nga komentet që bënin, kuptuam që ishin të mbresuar. Bisedat e tyre vërtiteshin rreth gjelbërimit, ndërhyrjeve të bëra në park, urës prej druri, por edhe kullës në të cilën nxituam që të ngjiteshim të gjithë me radhë, për të shijuar nga lart gjithë kurorën e pemëve.
Vrojtimi nga kulla panoramike kur qielli është i kthjellët shkon edhe më thellë deri në malin e Tomorit.
Pjesa më e madhe e turistëve që e vizitojnë këtë zonë janë shqiptarë. Por sipas punonjësve në Kullën e Vrojtimit në Parkun Kombëtar të Karavastasë, ka vështirësi në evidentimin e numrit të saktë të turistëve, duke qenë se kryesisht vijnë në periudhën e verës dhe në zonat ku bëhet plazh.
Ndikim te numri i vizitorëve ka dhënë edhe fakti se është ndaluar gjuetia e paligjshme, edhe pse nuk mungon ndonjë rast sporadik. Janë kryesisht raste që vijnë nga njerëz që futen nga zona e Kavajas dhe monitorimi i tyre është gati i pamundur edhe pse parku monitorohet në 24 orë.
Falë moratoriumit është vënë re shtimi i numrit të shpendëve, duke e bërë zonën më të populluar, çka i rrit akoma dhe më shumë vlerat kësaj zone.
Turizmi i vëzhgimit të shpendëve apo kafshëve të egra, tashmë po kthehet në një lëvizje të vërtetë turistike edhe për vendin tonë.
Me dhjetëra vizitorë vendas e të huaj, vijnë të vëzhgojnë nga afër shpendët e shumtë që kanë zbritur kohët e fundit dhe vazhdojnë të zbresin në këtë park të mbrojtur më së miri nga moratorium i gjuetisë dhe pylli i dendur.
Vendet më të preferuara nga vizitorët janë “Ishulli i Pelikanit”, Këneta e Madhe ku jeton Pelikani, por edhe shpendë të tjerë dhe Këneta e Vogël, ku kryesisht strehohen Flamingot dhe Rosat e Egra.
Flamingot dhe shpendët e tjerë ujorë, që popullojnë lagunën e Divjakë-Karavastasë, kanë tërhequr vëmendjen e mediave botërore me reportazhet e tyre të shumta për jetën e egër në këtë park.
Bregdeti në Divjakë
Shëtitja në Parkun Kombëtar të Divjakës të lë një shije të mirë, pasi ajri i freskët dhe optimizmi që të përcjell natyra e qetë, të mbushin me optimizëm. Pas gjelbërimit, pemëve dhe aromës së pranverës që ndihet kudo, i drejtohemi bregdetit. Përpara nesh shtrihet një brez i gjerë rëre, të pastër dhe të pashkelur. Aty këtu sheh guaca deti, të cilat për kuriozët janë një aset me vete.
Bregu i detit ofron mundësi argëtimi për fëmijët, të cilët shijojnë rërën dhe ujin e kripur. Madje, ky brez i gjerë rërë është një burim i rëndësishëm energjie dhe kure mjekësore për shumë të moshuar, dhe jo vetëm, që për të kuruar sëmundjet reumatizmale zgjedhin bregdetin.
Referuar të dhënave, ujërat e lagunës, të cilat arrijnë afërsisht 1.5 metra thellësi, janë të pasura me peshq, veçanërisht qefull dhe ngjala, gatimi i të cilave ofrohet në shumë prej restoranteve të plazhit të Divjakës.
Plazhi ranor i Divjakës është i pasur me sasi të konsiderueshme jodi dhe temperaturë mbi 200C, që fillon qysh prej gjysmës së dytë të muajit maj dhe vazhdon deri në fillim të tetorit. Kjo është një zonë ku aktivitetet e plazhit mund të ndërthuren lehtësisht me eko-turizmin. Rreth 300.000 pushues vizitojnë plazhin e Karavastasë çdo vit, me rreth 8.000 vizitorë në ditë në verë, ku shumica e vizitorëve vijnë me makina.
Kulinaria
Kur vjen puna tek fundjavat dhe destinacionet që zgjedhim për të kaluar kohën e lirë, përpos natyrës, resurseve dhe gjithë aktiviteteve ku mund të argëtohemi, një vëmendje të veçantë në zgjedhjet tona përbën edhe kulinaria e zonës. Dhe në rastin e Divjakës, nuk mund të linim pa përmendur edhe këtë pjesë.
Duke qenë se turizmi në Parkun Kombëtar Divjakë-Karavasta është zhvilluar më së shumti për turistët ditorë, edhe kulinaria është e përqendruar te prodhimet e peshkut, për të cilat zona është e famshme në të gjithë vendin. Po kështu, menutë në këtë zonë, kanë në bazë të tyre edhe shumë prodhime të zonës, të freskëta dhe të shëndetshme.
Të njohim Parkun Kombëtar Divjakë-Karavasta (Disa detaje)
Parku Kombëtar Divjakë – Karavasta është i vendosur në Shqipërinë e Mesme, buzë detit Adriatik, ndërmjet lumenjve Shkumbin dhe Seman, me një sipërfaqe prej 22,230 hektarë.
Karavastaja është një nga tri zonat Ramsar në Shqipëri: ajo është strehë për një numër të madh të shpendëve dimëruese, ajo është gjithashtu një vend i rëndësishëm për shumë specie me interes të madh të ruajtjes, si Pelikani dalmat (Pelecanus crispus).
Parku Kombëtar Divjakë-Karavasta është një zonë e mbrojtur në zonën bregdetare të Shqipërisë, që përbëhet nga ekosisteme komplekse, shumë të pasura në biodiversitet dhe burime natyrore.
Parku është shpallur si zonë e mbrojtur natyrore për shpendët e ujit, si ligatinë me rëndësi ndërkombëtare sipas Konventës së Ramsarit, që nga viti 1995.
Zona e parkut kombëtar Divjakë-Karavasta është zona më e rëndësishme komplekse e Shqipërisë për sa i përket biodiversitetit. (Përgatiti Elberta Spaho)
